[日本職人] 播種和菓子

唔知從幾時開始，和菓子喺日本變得愈來愈「離地」。好多時要喺西武、伊勢丹等高級百貨公司先會見到和菓子，仲要係一盒盒禮盒裝，除非要送禮畀人，唔係平時應該都真係唔會去買。

和菓子教室YUIMICO嘅導師小坂歩美和大森慶子見到和菓子愈來愈被日本人遺忘，異口同聲話：「如果日本美好嘅事物消失嘅話就實在太可惜啦。我地想盡自已所能，用自己嘅方法將和菓子帶到大家身邊，所以就創辦咗這個和菓子教室啦！」

 

講到和菓子教室，原來日本嘅和菓子教室係少之又少！大森先生話：「日本冇咩和菓子教室，明明係日本，但係竟然冇咩人做和菓子…可能大家都覺得和菓子文化太高不可攀，所以我成日都上堂時同大家講，叫大家喺屋企都試吓做和菓子啦！心諗如果因為咁樣而能夠令和菓子文化變得更加深入民心就好啦…」

 

訪問當日，小坂先生教大家做桔梗練切和菓子。佢解釋：「而家（8月）差唔多係桔梗開花嘅季節（秋天），我們通常都會預早做下一個季節主題嘅和菓子，好似可以提前享受咗咁～」其實如果大家有留意的話，和菓子通常都係同啲花花鳥鳥，時令水果等等有關係。小坂先生就話：「日本有春夏秋冬四季之美，喺一件小小嘅和菓子入面，能夠表現出依種美感，正正就係和菓子嘅厲害之處！」而家大家知道點解和菓子主題成日離唔開四季啦～

 

淨係開班授徒，教大家做和菓子、欣賞和菓子都仲未夠，YUIMICO嘅兩位老師都成日都諗方法令和菓子更加大眾化。大森先生就話覺得喺本身嘅和菓子文化上面加啲新元素，會令和菓子更加入屋：「我覺得隨住時代改變，和菓子跟住有啲變化都唔係唔得吖～」訪問當日，大森先生就教大家喺椰汁糕和菓子（葛餅）入面加咗啲菠蘿入去，而學生們都一致好評，仲話：「原來和菓子都可以咁整㗎咩？」其實和菓子都可以好in好潮㗎～

 

其實和菓子嘅對手除咗年代同時間之外，仲有就係近年喺日本大行其道嘅洋菓子，啫係我同你去日本都最鍾意食嘅pancake、蛋糕等等。大森先生話：「超級市場有賣整洋菓子嘅工具，但係竟然冇賣整和菓子嘅工具，可能因為冇得賣，所以就會少人用，少人整啦。但係其實一件件製作和菓子嘅工具，都包含住和菓子嘅文化，係一樣好美麗嘅嘢。」

「如果我地嘅教室可以令和菓子文化更加融入大家的話，大家就會去買更加多和菓子用具，咁樣就會有更多人成為製作和菓子工具嘅職人，如果係咁的話，和菓子文化應該就可以承傳落去啦…」佢笑一笑，然後就話：「嗯…依個就係我嘅目標啦！」