橫濱鄰近東京，從澀谷出發一程車就到，係唔少人放假時去放鬆嘅選擇～橫濱嘅紅磚倉庫同中華街等等旅遊景點非常出名，今日就等小編介紹一間好近依啲景點嘅膠囊酒店「Y’s CABIN 横浜関内」畀大家啦！
———————-
膠囊房
Y’s CABIN 横浜関内嘅房間分為男性區域同女性區域，住客要用鎖匙卡先可以進入到房間範圍，保安非常嚴密，女仔一個人去旅行都無有怕！小型行李放置區位於會上鎖嘅房間範圍入面，而大件行李就可以交去大廳保管，住客們唔洗擔心行李嘅放置問題。
依到嘅膠囊房有啲特別寬敞，張開雙手都唔會撞到牆，有足夠活動空間。酒店會為客人提供毛巾同睡衣等等，房內嘅電視機可以拉出嚟隨意調教角度，仲有張可以摺起嘅收納桌，出差要用電腦就啱晒啦～酒店重視保安，每個住客嘅房內都有個儲物櫃，有啲大小仲足以容納一件細喼同背囊等等，非常驚喜！大家亦可以拉上門簾慢慢休息，享受私人空間～
———————-
大浴場及獨立浴室
浴室係男女分開，男士們可以去大浴場淋浴同浸浴之外，仲可以焗桑拿㖭！至於女士們就可以去獨立浴室到沖涼。值得一讚嘅係，依到嘅納米氣泡花灑保濕同除污力十足，仲有效促進血液循環！更衣室內有多個儲物櫃，可以用嚟放衫同貴重財物等等，咁大家就可以放心慢慢沖都得啦。沖完涼之後，大家可以去化妝間到坐低慢慢吹頭、護膚等等，當然風筒同乳液酒店都有齊啦～
———————-
休息室及吸煙房
休息室有電腦充電插座，大家可以喺到工作、上網等等。肚餓嘅話可以隨時使用24小時都用到嘅小食自動販賣機，買炸雞、飯糰等等醫肚，好味得嚟又方便～去旅行好多時候都會攰到成個人散晒，依個時候大家可以坐吓按摩椅（需投幣）、用吓腳底按摩器（需投幣）消除疲累，好嘆啊～休息室內又有間吸煙房專為煙民而設，大家可以坐喺梳化到吸煙，房內有煙灰缸提供，非常貼心。
———————-
售賣及租用服務
Y’s CABIN 横浜関内嘅大廳服務檯有提供售賣同租用服務。大家可以喺到買到拖鞋、眼罩、耳塞等等，確保大家有覺好訓；另外又可以租借護髮風筒、電髮棒、燙斗、等等，咁就可以打扮到靚靚再出去玩啦～
———————-
自動結算機
去外國旅行，好多人都會擔心語言不通嘅問題。好彩依到有部對應到中文嘅自動結算機，大家可以用依部機辦理入住同退房手續，仲可以用信用卡㖭，好方便啊！
———————-
交通方法
從澀谷出發：乘坐東急東橫線到橫濱，轉乘みなとみらい線於馬車道站下車，徒步約6分鐘
從JR關內站北口出發：約徒步1分鐘
———————-
Y’s CABIN 横浜関内
〒231-0016 神奈川県横浜市中区真砂町4-43
入住時間：16：00
退房時間：10：00
如果大家有興趣嘅話，不妨睇埋依間5月25日新開張嘅酒店Y’s CABIN & HOTEL 那覇国際通り啦！
About Post Author
