大阪道頓堀住宿推介 徒步1分鐘即到難波站！大阪自由行

 

去大阪旅行，其中一個必去景點就係道頓堀啦～依到有五花八門嘅手信舗同食肆，仲有打卡熱點固力果大招牌㖭！今日就等小編介紹一間位於道頓堀嘅膠囊酒店「Y’s CABIN大阪難波」，由難波站行返酒店只需要約徒步一分鐘，好就腳啊！

—————————–

膠囊房

Y’s CABIN大阪難波係一間膠囊酒店，全館一共有成162個膠囊房間咁多！房間分為男性層同女性層，住客要用鎖匙卡先可以進入房間範圍，而行李放置區亦都位於有鎖嘅房間範圍入面，保安幾嚴密㗎。另外酒店又會為每位住客提供一個儲物櫃，大家可以將貴重財物放喺儲物櫃入面，咁就可以放心休息啦～

膠囊房間麻雀雖小，五臟俱全。房內有足夠活動空間，酒店會為客人提供毛巾同睡衣等等，房內嘅電視機可以拉出嚟隨意調教角度，大家亦可以拉上門簾慢慢休息，享受私人空間～

—————————–

大浴場 桑拿房

大浴場男女分開，男士們除咗可以淋浴同浸浴之外，仲可以焗桑拿㖭！女士們都唔洗羨慕，因為依到嘅納米氣泡花灑保濕同除污力十足，仲有效促進血液循環㗎！更衣室內有大型同小型儲物櫃，可以用嚟放衫同貴重財物等等，咁大家就可以放心慢慢沖都得啦～

—————————–

休息室 榻榻米區和閱讀區

沖完涼想休息吓，可以嚟休息室、榻榻米區或者閱讀區休息休息～榻榻米區放滿咗多套人氣漫畫，仲有得意章魚燒帽畀大家影相留念。閱讀區就放咗好多大阪食店單張，未計畫好行程嘅朋友可以參考參考。想按摩吓嘅話可以試埋部腳底按摩機（需投幣），一邊按腳一邊休息，好爽啊～

—————————–

售賣及租用服務

唔講唔知，原來Y’s CABIN大阪難波嘅大廳服務檯有提供售賣同租用服務。依到有杯麵、薯片、朱古力、糖果等等零食出售，仲有護髮風筒、燙斗、桌上遊戲等等出租㖭，好貼心啊～

—————————–

自動日圓兌換機

去日本旅行最怕就係帶唔夠日圓，玩嗰陣要就住就住，真係好痛苦（哭）好彩酒店入面有自動日圓兌換機，操作簡單又有中文說明，用港幣直接兌換到日圓，非常方便。
—————————–

早餐

依到嘅早餐款款精緻，燒魚非常滋味～日本人習慣將生雞蛋打喺白飯上面再撈豉油食，有興趣嘅朋友們不妨試吓！

—————————–

交通方法

地下鐵難波站（25號出口）徒步約1分鐘
阪神 近鐵大阪難波站 徒步約3分鐘
JR難波站 徒步約5分鐘
南海電鐵難波站 徒步約10分鐘

—————————–

Y’s CABIN大阪難波
地址：〒542-0071 大阪市中央区道頓堀2-2-9
入住時間：16：00
退房時間：10：00

—————————–

如果大家有興趣嘅話，不妨睇埋依間5月25日新開張嘅酒店 Y’s CABIN & HOTEL 那覇国際通り啦！