2016年度日本流行語大賞結果今日終於公佈咗喇！其實呢個「新語、流行語大賞」係日本自由國民社主辦嘅活動，每年都會挑選啲反應番嗰一年日本嘅社會現象，而且引起話題嘅年度大獎同前十名詞句，並頒獎畀呢啲詞句所相關嘅人物或團體。
一齊睇下今年嘅結果啦！
年間大賞（第一位）：「神ってる」
呢個「神ってる」（かみってる）其實係來自職業棒球隊廣島鯉魚緒方孝市監督。佢用呢個自己創作嘅詞去形容6月18日連續打出兩場比賽都打出Saynoara Homerun（即第9局關鍵決勝分嘅全壘打）嘅鈴木誠也選手，表示佢喺球場上精彩活躍嘅表現有如神一般！
其他10大上榜流行語：
「ゲス不倫」：因於週刊文春揭發而造成哄動嘅「極品下流少女」有婦之夫主唱川谷同混血藝人Becky出軌，簡稱「ゲス不倫」（下流不倫），之後亦用嚟形容日本議員因老婆生仔而走去滾嘅宮崎謙介議員事件。
「聖地巡礼」：因電影《你的名字。》而引發超人氣嘅聖地巡禮現象，其實早幾年開始愛好動漫作品嘅粉絲會到該作品取景地重溫各種景色。
「トランプ現象」：今年11月勝出總統大選當上美國總統的特朗普因過激、不當發言及其支持者和反對者造成嘅各種現象。
「PPAP」：唔使多講都知講緊Piko太郎嘅I have a pen啦～
「保育園落ちた日本死ね」：一篇匿名投稿嘅blog，以「托兒所收皮日本去死」為題怒鬧日本社會無考慮過托兒所數目唔夠令日本父母根本唔可以唔放低工作照顧兒童，亦係導致日本少子化嘅原因，引發社會討論。
「（僕の）アモーレ」：日本國腳長友佑都選手向女演員平愛梨求婚成功，之後向記者們表示平愛梨係佢嘅Amore～（意大利文嘅愛嘅意思）。
「ポケモンGO」：於全球多個國家都引發社會現象嘅手機遊戲程式Pokemon Go！
「マイナス金利」：日本銀行為咗刺激經濟採取非傳統嘅金融政策「負利息」。
「盛り土」：象徵著東京原本想將築地市場遷移去豊洲市場時被揭發嘅一系列土地問題。
另外，「選考委員特別賞」就頒咗俾捐咗錢支持修復熊本城嘅金主們「復興城主」。
以上嘅流行語都係反映咗日本社會潮流熱話嘅字句，唔知留意開日本新聞文化嘅大家又識唔識哂咁多個呢？
官方網站：日本流行語大賞網站
About Post Author
