FF呢樣嘢…本來就好普通，試問有邊個未試過FF？ 不過好似日本咁，唔單止FF到打第三次世界大戰，又同美軍一齊上，又中國又北韓，之後連核武都出埋，最後仲搞到上日本國會，個規模會唔會大咗少少？
今次要講嘅係有關一班軍佬喺1963年今日攪出嚟嘅FF…係圖上推演先正確！ 話說二戰之後為咗防止日本軍國主義復活，於是就搞咗條和平憲法第九條規定日本不得擁有軍力，並否定其「國家的交戰權」。不過自衛隊參聯會事務局就喺1963年6月就曾經背住政府FF…圖上推演。
成件事嘅推手係自衛隊參聯會事務局長田中義男少將，推演目的係演算國際出現重大事件事，如何同美國合作出兵，並對內實施戒嚴令，限制民眾合法權利及發動三軍，恢復軍人喺日本嘅權力。為此，佢哋甚至參考戰前日本軍事法令，準備制訂同恢復國家總動員令等緊急法令同措施。
1950年韓戰爆發
至於點樣先可以有機會﹖佢哋就度咗以下嘅劇本，睇下頂癮唔頂癮﹖
第一階段﹕
假設韓國政局惡化，部分軍隊發動叛亂，令日本治安狀況惡化。（事實上一直有傳說）
第二階段﹕
韓國叛軍得到北韓支援，美軍介入反擊，事情演變成越戰咁嘅狀況。
第三階段﹕
第二次韓戰爆發，日本西部地區形勢危急，自衛隊進入一級戰備狀態，並實行全國總動員。
第四階段﹕
韓國軍事政治形勢進一步崩潰，自衛隊出兵與美軍協同作戰。
第五階段﹕
日本西部及九州地區遇襲，美軍於半島使用核武，北海道亦受到蘇聯嚴重威脅。
第六階段﹕
蘇聯大規模軍事介入，日美再次協同作戰。
第七階段﹕
日本本土全境遭蘇聯海空攻擊，核武器嘅應用擴展到整個戰場，駐日美軍對薩哈林島、朝鮮、中國實施核報復，美方取得最後勝利。
睇佢個設定直情可以跳過「星雲獎」挑戰「雨果獎」ＸＤ！ 不過軍方對於呢個劇本真係超級認真，自衛隊甚至已經諗定一旦打起上嚟，就會向國會提出接近90件戰爭法案，其中包括國家總動員體制、由自衛隊代替警察承擔國內治安任務等一系列「戰時措施」，以保證軍方能取回實權。
當然啦，咁大件事點可能唔穿崩﹖ 就喺1965年今日，呢個計劃喺社會黨議員岡田春夫於國會上質問下終於曝光！ 全國上下對於檯底原來搞緊啲咁嘅嘢就梗係嘩然啦。不原因唔單止係「恢復軍國主義」與否嘅問題，而係由軍人秘密制訂作戰計劃和緊急法令，已經大大超越軍人權限，甚至已經到咗「干預政治」嘅地步。
佐藤榮作
對於當時剛上任嘅首相佐藤榮作，係隨時會令佢嘅內閣被「秒殺」嘅政治炸彈，於是只好聲稱「三矢研究」係「未經大臣定奪嘅空想文件」，並以「泄漏文件」為由處罰防衛廳幹部了事。而事實上由於剛上任嘅佐藤榮作政府，一年內就將日本由經濟蕭條帶出來，甚至進入「伊奘諾景氣」嘅經濟起飛，因此也竟就將事件壓制下來。而日本嘅「有事」法案亦要去到海灣戰爭先再由自民黨秘書長小澤一郎再次提出。
About Post Author
