前晚同壞人哥去食完燒肉放題之後，原本諗住去超市買果汁返屋企飲。
但係呢，俾我發現到……
你睇！燒布甸只係賣89yen咋！！！
就係咁，挑起我條癮，我決定要食甜品！！！！！
由於上次有巴打推介我食既抹茶雪糕要240yen，慳妹既我覺得太貴無食到～
我就諗，超市會唔會有100yen都唔洗既甜品呢？
於是，我就開始搜尋行動！！！
一盒有三個布甸，仲要只係89yen，唔買對唔住自己啦！！！
64yen就有一條紅豆味雪條！！！真係超平！！！
但係，我唔食紅豆味既，所以無買到～
呢個真係無得了！size係拳頭咁大，只係賣62yen！！！
所以，諗都唔諗就兩隻味都買左！！！
＝＝＝＝＝我是低B分隔線＝＝＝＝＝
買左返屋企，我就即刻食，睇下有無中伏。
睇到呢到，肯定你地好期待我中伏XDDD
你睇，真係都幾大個下架～
我係抹茶控，基本上，凡係抹茶味既甜品我都中意食～
食落去，抹茶味道都幾濃，唔算太甜～
唔洗5分鐘俾我ko左！哈哈哈
之後就即刻食另一個喇～～～
初頭諗，多數賣公仔既野食都伏伏地，可能呢個會似藥水味～
食左第一啖，已經覺得超好食，明明拎手機影相俾大家睇～
但我係影之前都忍唔住食多幾啖～好似倉鼠咁食住雪糕影呢張相～
係草莓牛奶糖味，加上脆卜卜既朱古力碎，食落幾有口感～正！
呢個不得了，係好食到我停唔到口，完全無手影相XDDD
唔洗1分鐘就ko左……1個布甸！
今次慳妹作戰計劃好成功！完全無中伏！
肯定你地好失望，因為我無中伏XDDDD
總結︰三個字，平靚正！！！
About Post Author
