Pokemon Go熱潮除咗帶動咗任天堂嘅業務之外，週邊唔同嘅商戶亦紛紛出嚟抽水，好似「無限免費Pokémon GO數據流量」、「各種優惠包車服務」、甚至連「大閘蟹減價折扣」都有，不過靠Pokemon Go搵另一半，你地又有無諗過呢？
日本聯誼公司「Find the One（ファインドザワン）」就推出咗一個叫「Pokemon Go Party」嘅計劃，希望大家可以喺Pokemon Go當中搵到真愛。
擺脫以往坐定定，吹吹水嘅聯誼方式。聯誼場地由室內去到「Lohas 池袋」舉行。將單身男女分為唔同小組，係池袋街頭一邊捉小精靈之餘，一邊加深了解，指定時間結束後就返回會場公佈成績再一齊享用晚餐，希望透過遊戲加強參加者之間嘅互動（前提係你唔可以淨係專注捉小精靈！XD）
反應亦相當熱烈，男士名額已經爆滿，女士亦都差唔多爆滿，可想而知Pokemon Go嘅魅力有幾大！
另一間聯誼公司「合同會社 ena」就更特別。參加者可以直接去日比谷公園或者小田原城報名，之後透過Line群組進行溝通，利用提供嘅信物同暗號嚟搵出其他參加者，成個緣份遊戲咁，夠晒浪漫同刺激。最後主辦單位會喺指定地點放櫻花營造集合點。
不過呢度就不包含晚餐時段，約食飯呢啲就要靠自己喇！活動將會陸陸續續係唔同地區舉行，好似上野公園、代代木公園、井之頭公園等等。
反正咁多人願意為Pokemon Go而成功踏出屋企間房，香港嘅公司就不妨諗諗佢，話唔定可以開拓一個新嘅商機，為一眾毒男帶來希望呢！ XD
About Post Author
