有冇試過去餐廳食飯咁啱撞正員工放飯時段，偷偷望吓佢地食乜餸，覺得佢地嗰邊好似好味啲呢？唔講唔知，原來坊間有唔少料理都食由員工膳食演變而來，好似奄列飯、咖喱鍋等等。而將會於5月中分別喺東京、大阪同名古屋舉行嘅「an まかないフェス2017」就可以食到咁「特別」嘅料理！
今年嘅「an まかないフェス2017」3個會場總共有36間舖頭出店，主打以一個銀仔¥500就可以食到連店內都唔會食到嘅「員工膳食」！唔好以為員工膳食就一定係用料差賣相差，睇完以下介紹，係咪對「員工膳食」呢四個字另眼相看呢！
大阪會場
SABAR「鯖魚三文治」
鯖魚三文治係大阪嘅獨有美食，將鯖魚拖羅加少許鹽燒到香一香，每一粒都係一口size，揸住食勁方便！食嘅時候可以夾埋搽滿茄醬同薯仔沙律嘅脆多士一齊食，份外香口！
北新地ぎょうざ家「芳壽豚叉燒」
芳壽豚係長崎嘅名牌豬，肉質香甜脂肪多，非常適合用嚟整叉燒！北新地用咗自家製醬汁去醃製，再以低溫烤焗，焗出嚟嘅叉燒極之入味軟滑。
東京會場
希須林「魯肉飯」
魯肉飯可以話係中華料理中經典嘅經典！呢個飯用咗五花腩同大腿兩個唔同部位嘅肉以醬油、蒜頭、五香粉等長時間炆煮炮製而成，連飯放入口豚肉油香四溢嘅同時仲咬到紮實嘅豚肉質感，香濃惹味！
格之進「格之進免治生菜漢堡」
免治肉用嚴選嘅優質黑毛和牛及岩手縣嘅白金豚整成，炸到脆卜卜之後用生菜包住食，咬落充滿肉香，生菜嘅菜汁巧妙地令到整道料理唔會過份乾身。
気むずかし家「信州名物 山賊燒」
珍寶雞扒勁大塊，以蒜頭等調味料醃到入味之後炸到脆一脆，一咬落去肉汁爆哂出嚟，同酸酸地嘅他他醬味道超夾！
名古屋會場
魚屋の台所 下の一色「魚仔乾半熟流心蛋丼飯」
咩係「簡單的美味」，食完呢碗飯就一定體會得到！店家非常重手地將來自愛知縣帶有微辣嘅魚仔乾舖滿飯面，加入鹽、胡椒、特製醬油作簡單調味之後再加入半熟嘅流心蛋，單係個賣相已經可以畀夠100分！
麺屋 桜「櫻之拉麵」
有時員工嘅膳食就係就地取材，見到有咩材料就用咩材料，所以呢碗拉麵有雞肉丸做topping一啲都唔出奇！湯底以大量魚介及雞殼熬製而成，香濃得嚟味道嘅層次亦非常豐富，係坊間幾乎係零機會食到嘅「夢幻料理」！
由於活動嘅主題係「員工膳食」，所以活動過後即使去相關店舖亦未必可以再點到相同菜式，強烈建議大家要空肚入去，試盡各間名店嘅「隱藏版」美食同甜品！
大阪會場
地點：西梅田スクエア（旧大阪中央郵便局跡地）
地址：大阪市北区梅田3-2-4
時間：5月12～14日 11:00～21:00
東京會場
地點：中野四の森公園 特設会場
地址：東京都中野区中野4-13
時間：5月25～28日 11:00～21:00
名古屋
地點：久屋大通公園 エンゼル広場
地址：愛知県名古屋市中区栄3-15
時間：5月19～21日 11:00～20:30
官網：weban.jp/contents/c/makanaifes_pc/
About Post Author
