日本人氣年輕男演員三浦春馬（26歲）同國際知名舞者菅原小春嘅緋聞自2016年9月已經開始被傳。雖然二人一路無承認，不過2月14日情人節當日兩人著住情侶Tee甜蜜合照嘅相就被佢哋嘅外國友人up咗上IG story，當然畀粉絲發現添啦！雖然事後呢啲相已經被del，不過手快嘅網民已經即刻cap曬圖，令戀情正式曝光！
當日仲係菅原小春嘅生日，三浦春馬11日完成宣傳NHK大河劇《女城主直虎》嘅工作後即刻前往英國匯合女友。今次流出嘅相片相信係佢哋喺倫敦度過sweet爆情人節被拍低嘅。相片見到平時勁型嘅兩位面上都露出戀人感滿滿嘅表情，尤其平時工作關係個樣勁cool嘅菅原小春即刻成個少女咁！
個友人仲要唔放過任何一刻，連佢哋係張床度攬埋一齊嘅story都up埋！
雖然有粉絲撐兩位都幾襯，因為雙方都係非常事業有成嘅星，不過亦有人質疑係咪係咪其中一方刻意流出博宣傳。甚至有粉絲搵出呢個所謂嘅友人之前亦曾經up過佢哋其他合照，話唔明當事人點解可以咁無戒心喎～
其實明星都係人，拍下拖都好正常啫～隱瞞又畀人話，曝光又話人搏宣傳，明星真係好難做嘅呢。
資料來源：《週刊女性PRIME》、《Girls Channel》
About Post Author
