講到芝士撻名店，大家係咪第一時間就諗起開到成行成市嘅「PABLO」？不過今次所講嘅猛料甜品店並唔係呢間，而係質素同賣相都同PABLO有得揮嘅「OVEN Lab.」！
呢間芝士撻甜品店品牌喺2016年8月31日先正式進駐日本，但到而家一年都未夠就已經開始開設分店，喺今年3月30日更加會喺神戶嘅JR垂水站開設第3間分店！
講到當店最受歡迎嘅就一定係原味流心芝士撻，當時一開店就日賣1,700個，真係好誇張！個撻從外而內都咁誘人，因為佢擁有烤到徵焦嘅外層，一咬開又有非常幼滑濃郁嘅芝士流心，熱辣辣咁放入口，叫班芝士迷點忍得到唔愛上呢個甜品！
除咗個原味芝士撻係OVEN Lab.嘅必試推介，呢個朱古力芝士撻都係令人忍唔到手之作！因為用咗比利時嘅上等朱古力製作，入口唔會太甜，仲滲透住芝士獨有嘅香濃，味道豐富得嚟又好高級，本身好鍾意食朱古力的話一定一定一定要試！
最特別嘅係唔同店舖都會推出店舖限定嘅款式，好似將於3月30日開幕嘅垂水店就會推出「即燒焦糖半溶布甸」！
為咗可以做到熱辣辣同脆卜卜嘅焦糖效果，甜品師會喺客人落咗單先即刻用火槍燒，保証上枱時成個布甸仲係keep到最佳狀態。
下次去日本，除咗PABLO，想食流心芝士撻的話又可以多個選擇啦！
オーブンラボ プリコ垂水店
地址：兵庫県神戸市垂水区神田町1-20 プリコ垂水東館内
電話：078-704-6708
營業時間：10:00～21:00
官網：www.sweetgarden.co.jp/sgweb/sweetgarden/tarumi/
About Post Author
