喺網絡上瘋傳緊滿島光為日本具影響力電音樂隊MONDO GROSSO喺香港取景拍嘅MV「ラビリンス」，MONDO GROSSO以音樂人大澤伸一為主，90年代起一直以破格及新潮曲風引起話題。今次時隔14年推出新專輯「何度でも新しく生まれる」更加係佢哋第一隻全日語歌曲專輯，除咗滿島光亦搵嚟乃木坂46嘅齋藤飛鳥、bird、UA、moumoon嘅YUKA等多名歌手合作。
（同齋藤飛鳥合作嘅惑星タントラ）
同滿島光合作嘅呢首「ラビリンス」以電影級剪接手法，多個一鏡到底嘅鏡頭將攝影名地鰂魚涌海山樓、佐敦廟街、南京街、深水埗鴨寮街、北河街等地道得嚟充滿感覺嘅街景完美呈現。配上滿島光慵懶嘅唱腔、獨特嘅舞步、迷幻嘅燈光及電音，教唔少樂迷直呼成個MV為高質之作！推出短短兩日已經超過70萬人觀看，好多香港人都大讚將平凡街景拍得好有feel、好靚！
不過有唔少留意開電音嘅樂迷就話個MV感覺似曾相識，指拍攝風格、女歌手跳奇幻舞步、以及都係喺非日本嘅超地道景色取景，都同日本Hip－Hop電音樂隊「星期三的康帕內拉 」嘅「Unico」非常相似。「Unico」係佢哋2016年6月22日推出嘅EP「UMA」入面收錄嘅作品，啟發自手塚治虫同名作品「ユニコ」。MV入面女主唱KOM_I喺新加坡街頭，喺歌曲配襯下自然舞動身體，舞姿獨特引起話題。
負責編舞俾滿島光嘅原來係有份幫荷里活歌舞片《星聲夢裡人》編舞嘅Jillian Mayers！而星期三的康帕內拉嘅Unico就未有註明舞步係邊個編排，相信只係女主唱KOM_I隨心自然地活動肢體嘅舞步。雖然有電音fans指MONDO GROSSO嘅PV難免有少少似有抄襲成分，不過亦有網民覺得兩件事完全唔同，曲風唔同而舞步感覺亦都不一樣；更加有人覺得抄襲一事不值一提、唔希望將一隊新人樂隊同殿堂級樂隊比較。唔知大家又點睇呢？
小編只係希望日本樂迷睇完MONDO GROSSO嘅PV後會有興趣嚟香港玩啦！
其實香港真係好靚架～
資料來源：YouTube、Cinra、Natalie、BARKS
About Post Author
