普天間基地搬遷訴訟宣判前席魚鷹機出意外迫降海面！

有留意日本新聞嘅，應該都知道糾纏多年嘅普天間基地搬遷官司，日本中央政府對反對將美軍普天間機場搬遷至名護市邊野古，而要求遷出縣外沖繩縣知事翁長雄志所提出嘅訴訟，將於本月20號宣判上訴結果，而普遍認為翁長雄志將被判敗訴。不過尋晚所發生嘅意外，未知對整體大局會否構成影響。

話說當地尋晚9點半左右，一架隸屬普天間基地嘅MV22魚鷹運輸機喺沖繩名護市對開約1公里海面急降，魚鷹機上五人全部獲救，其中兩人受傷。而魚鷹就損毀嚴重，機翼甚至已同機身分離。而之後再有傳媒踢爆原來幾乎同時間有另一架魚鷹竟然要以機腹直接於普天間基地著陸。

接近同時間有另一架魚鷹竟然要以機腹直接於普天間基地著陸。

事件再次激起沖繩居民嘅不滿。而日方亦表示已要求停飛「魚鷹」，直至查明原因。而今次係基地搬遷有望重啟之前，首次於日本境內發生「魚鷹」重大事故，相信會令當地反對搬遷嘅聲勢更加大。

普天間基地

邊野古

其實沖繩居民一向不滿美軍將基地設於沖繩，特別係普天間基地位於沖繩市中心，非常接近民居。軍機升降造成噪音同污染之餘，一旦墜機更會造成重大傷亡，基地軍人又時不時同親愛嘅休班警察「睇齊」，特別係性侵日本女性更加係久唔久就嚟一劑。

原本日本嘅中央政府就想透過遷移基地減輕影響，但沖繩地方就希望美軍能撤出沖繩以外，而沖繩縣知事翁長雄志就指即使官司敗訴，亦會用其他方法盡力阻止工程上馬。而安慶田光男副知事更直指今次墜機事件中沖繩美軍高層、第3海軍遠征軍司令官尼克遜態度差劣，不單止日本方面將事件「政治化」，更指事件冇平民傷亡應該多謝「魚鷹」駕駛員，安慶田光男更向傳媒指尼克遜根本當當地係殖民地。

究竟今次事件會唔會對基地搬遷再帶來新變數？咁就真係要放長雙眼睇啦。