深受女性觀眾歡迎嘅殺人網球作品『網球王子』，其音樂劇「『網球王子』3rd Season 青學vs六角」喺22日已經完成愛知站嘅公演，一眾實力凌駕學園都市LV.5嘅選手喺台上又跳又唱，好不精彩！ 劇組將於28日轉戰宮城，不過喺尾場嘅公演就發生咗意外，由於海堂薰嘅絕招實在太厲害，引致有觀眾波及受傷，而會場嘅對應更一度引起不滿。
話說，22日嘅表演其實都非常順利，不過叫得「殺人網球」，唔死返一、兩個人又點同當年俾網球炸飛嘅河村交代呢？ 果然最後都要由牧島輝飾演嘅超人氣角色海堂薰「做嘢」！ 當佢係台上唱「プレッシャー」嘅時候，佢使出一招「蛇球]，個拍突然真係好似條蛇咁直飛台下，然後就打中咗台下嘅觀眾。
對於戰地狀況冇概念嘅朋友不妨參考吓套片(同一首歌)自己腦補。
唔知大會同台上嘅選手見得大場面太多(畢竟連黑洞都見過嘛)，公演竟然完全冇受事故影響！ 而受傷嘅觀眾亦好似冇工作人員埋去睇睇佢有冇事。當然受傷嘅觀眾亦繼續燃燒生命去睇完場表演，先同同行朋友去主動尋求職員協助。
事件傳出去之後即刻引嚟大量對主辦單位不滿嘅聲音，不覺亦有人指完場後職員嘅對應其實都已經十分充足。而主辦單位亦都已經喺尋日發咗個道歉聲明，承諾會改善安全對策，同更加留心場內情況等等。希望同樣嘅事件以後唔會再發生啦！
About Post Author
