朱古力貴起上嚟可以好貴，但點都估唔到貴到一盒要成10萬円（平均1600円一粒……）！呢盒貴到飛起嘅朱古力係生朱古力專門店「Silsmaria」同抹荼老舖「辻利兵衛本店」嘅超豪華crossover之作，兩間店都出名產品高質，唔怪得個價可以叫到咁高啦！
除咗有2大品牌喺背後撐腰，用料同製作方法都極度講究亦係佢可以賣得咁貴嘅一大原因。呢盒朱古力入面一共有「抹茶生朱古力」、「宇治玉露焙茶生朱古力」、「露天園栽培宇治煎茶生朱古力」，淨係睇個名都知佢地來頭唔細，知道佢係點整之後真係不得不佩服日本人嘅講究！
抹茶生朱古力：用咗比利時出產嘅白朱古力及忌廉再加埋於2016年喺「一等農林水產大臣賞」中獲獎嘅手摘宇治茶製作而成。
宇治玉露焙茶生朱古力：加入經過焙煎並以石磨磨碎嘅宇治產玉露及威士忌製作而成。
露天園栽培宇治煎茶生朱古力：嚴選種植於溫差較大嘅童仙房露天園中嘅宇治煎茶，以石磨磨碎，再加入比利時出產嘅白朱古力及日本酒製作而成。
係咪超專業同講究呢！唔單止味道落足功夫，就連個包裝都高級到令人唔捨得拆開！外層佢地用咗傳統和布包住，就算係打個結都好似計過度過咁勁完美！打開個木色嘅四方盒就會見到上下兩層各三包朱古力，每隻味道都各有兩包，一包有十粒，份量又唔算太少，過關！
呢盒朱古力只限量賣30份，數量極少，有錢都未必食到，不過就算有錢，對於打份牛工嘅小編嚟講依然太貴太奢侈，如果睇緊呢篇野嘅你會試，記住留言分享吓係咪真係咁好味！
究極宇治抹茶生朱古力
發售日期：2017年2月1日（1月23日起接受預訂）
售價：¥100,000
About Post Author
