兄弟重聚！「譚仔」同「三哥」嘅漫長戰爭 由日資公司統一天下

［專欄：日本在香港］

仲記唔記得之前日本烏冬連鎖店丸龜製麵嘅母公司「日本東利多控股」（Toridoll Holdings）收購大家都食開嘅「譚仔雲南米線」？ 當時Toridoll Holdings就表示將會於香港拓展至50間分店，亦會拓展至中國內地，例如以上海為中心開設約60間分店。估唔到「譚仔」同「三哥」嘅漫長戰爭，最終會由日本Toridoll Holdings劃下休止符！ 因為佢哋公佈公司已經達成協議，收購「譚仔三哥米線」100%股份。

收購完成後，Toridoll Holdings將全面擁有「譚仔三哥米線」，並於其香港分公司東利多控股有限公司旗下繼續營運。而到時Toridoll Holdings 於香港將持有108間分店，當中56間來自「譚仔三哥米線」，另外52間為「譚仔雲南米線」，共佔香港雲南米線市場約7成佔有率，真正「統一天下」XD！ 諗起到時喺香港食米線，會有7成機會一入舖就嚟返句唔鹹唔淡廣東話同「一二三些」，都咪話唔爽！ （新宿幾時開「Tam’s Express」XD）