京都新招疏渡人流 巴士1日券加價 地鐵＋巴士觀光券減價

有去開京都玩嘅朋友應該都會感受到喺京都坐巴士嗰個「盛況」吧。其實一直以嚟唔單止係遊客，甚至連本地居民都因為太多人坐巴士嘅關係而成日上唔到車。

京都市方面為咗紓緩巴士方面嘅壓力，就決定著手將遊客造成嘅人流疏導至地鐵服務。為此，市交通局方面決定來春開始會將市巴・京都巴士一日乘車券由現時嘅500日圓加到600日圓，而隨咗巴士之外連地鐵都坐得嘅京都觀光一日（二日）乘車券就會由1200（2000）日圓下調至900（1700）日圓。局方希望可鼓勵遊客多乘坐地鐵，以令每日乘車人次減少5500－9300人。

市巴・京都巴士一日乘車券

京都觀光一日（二日）乘車券

而除咗車費調整外，出於控制人流同增加收入，京都市亦正討論能否仿傚大阪，向留宿京都嘅旅客追加收取「宿泊稅」，不過遊學團等就可獲豁免。依家喺大阪只要於入住地點每人每晚費用一萬日元或以上，就要每人每晚交1-300日圓「宿泊稅」。而京都就算只係收100日圓，估計每年已經可以多二十億日圓以上額外稅收，可以用於改善當地旅遊設施質素。