只要識捐窿捐罅，日本真係有好多好野食！如果你去親日本都一定要去食新鮮吞拿魚料理，咁就一定要嚟呢間吞拿魚料理專門店「ニッポンまぐろ漁業団」，呢間專門店喺新橋同浜松都設有分店，店內環境極具漁村風味！
呢間食店其實有好多日本人都知道佢嘅存在，因為氣氛好之餘呢度嘅吞拿魚仲出哂名新鮮兼抵食，只要識得揀時間嚟，輕輕鬆鬆就可以食到抵食夾大件嘅招牌料理！
而講到去到冇可能唔食嘅就一定係呢個可以任夾吞拿魚嘅「天然まぐろぶつ盛り放題」（¥100），玩法有啲似以前Pizza Hut個沙律吧，店方會畀個特定器皿你，疊到幾高就睇你層層疊實力！但要挑戰呢道料理都要睇時間，因為每星期只會喺平日嘅下午5點到7點（2017年2月24日會由下午3點提供至晚上7點）呢短短2個鐘提供，想去記得唔好睇錯時間！
必食嘅料理有好多，除咗個層層疊吞拿魚放題，呢個藍鰭吞拿橫切刺身「ミナミまぐろ断面切り一枚刺」（¥1,890）都係必食推介，長達20cm嘅原塊吞拿魚就咁橫切上枱，一次過可以食哂赤身、中拖羅、大拖羅同稀有部位，最貼心係其實佢已經切好一件件方便用筷子夾嚟食！
建議大家可以由赤身開始食，跟住係中拖羅，最後先試大拖羅，因為大拖羅油脂最豐富魚香最重，食完大拖羅先食赤身，就算赤身質素再高都會覺得淡而無味。
既然食咗吞拿魚橫切刺身，已經試哂赤身、中拖羅同大拖羅，點解仲會點呢個吞拿魚刺身拼盤？好簡單！因為呢個拼盤「五点 食べ比べ」食到頭先食唔到嘅部位，好似魚頭等等嘅位置！
個拼盤除咗就咁當刺身食，店方教大家油脂較多嘅部位可以用個烤爐辣一辣，聞到香味就食得，呢種食法除咗可以迫出多餘油份，仲會令魚身增加一重焦香嘅味道！店主仲提醒大定燒嘅時候可以加幾條蔥一齊燒，因為可以令吞拿魚嘅魚香更突出喎！
最後一道必試料理就係呢個要敲開外層先會睇到入面廬山真面目嘅煙薰吞拿魚「まぐろアゴのハーブ薫る塩窯焼」（¥990）！
入面嘅吞拿魚焗得好Juicy，口感紮實到有少少似食緊雞肉，香草嘅味道已經滲哂入魚身，成道料理個balance做得非常好，不愧為吞拿魚料理專門店！
ニッポンまぐろ漁業団 新橋店
地址：東京都港区新橋2-14-3 新橋レンガ通り会館 4階
電話：03-3539-4035
營業時間：星期六至四 17:00～24:00、星期五 17:00～03:00
休息：無
ニッポンまぐろ漁業団 浜松町店
地址：東京都 港区浜松町2-7-3 ハナイ 浜松町ビル 1・2階
電話：03-5777-5375
營業時間：星期一至五 11:30～14:00、 16:00～24:00、星期六及公眾假期 16:00～01:00
休息：星期日
官網：nippon-maguro-gyogyoudan.jp
About Post Author
