喺今個月2號，關西其中一間私鐵阪急喺Twitter貼咗幾張相，張相入面嘅路軌有火。
其實呢幾張相並唔係火燭，係日本鐵路公司一種比較少用嘅融雪方式「燈油式融雪」，用得呢種燈油式融雪嘅鐵路公司，通常1年先會得2-3次要出動呢個裝置，公司營運嘅路線通常好少出現非常凍嘅日子，咁啲分叉軌就無咁容易凍結，就無好似大雪地區咁有D噴熱水融雪呢啲咁貴嘅融雪設備。
再大雪啲嘅北海道直頭喺分叉軌上面整個屋頂，下面嘅分叉軌附近就用暖風去吹走特有嘅粉雪。
不過呢啲融雪設備都貴嘔。所以唔係喺大雪地區嘅阪急就用返合成本啲燈油式融雪。
而燈油式融雪裝置都好少有，要用都只係會係車廠出去本線嘅分叉軌或車廠附近嘅車站嘅分叉軌先有，原因係燈油式融雪裝置有返一定高度，要放喺分叉軌下面就要掘走分叉軌下面嘅碎石（道渣），掘走咗碎石後嘅路軌就容易變形同移位，只可以用低速行經個一段路，所以都只會喺啲車廠或車廠附近設置，等火車可以出入車廠。有啲就預準咗位置，有條杭用黎放燈油式融雪裝置。
凍結咗嘅分叉軌撞唔開咩？有人咁問過車長，有機會得，不過有一定風險，3年前喺南松本就試過凍結咗嘅搵一架普通嘅電氣機關車去除雪，結果脱線出軌。
件事好彩喺貨物站入面發生，萬一喺載客站附近脱線出軌，回復正常短嘅都要用1日時間。
至於阪急點解要貼「燈油式融雪」上Twitter，廣報室話上年用「燈油式融雪」個陣有乘客貼上Twitter當係火警，結果真係有人當係火警報案。廣報室擔當一路苦笑一路咁講，不過阪急用燈油式融雪之前都會通知消防先。
阪急廣報室仲呼籲，各位乘客喺落雪日子見到分叉軌附近有火光的話，唔使打119報案，真係擔心的話先搵搵站員啦！
「燈油式融雪」Ｖｉｄｅｏ
散水式融雪Ｖｉｄｅｏ
About Post Author
