平昌冬奧閉幕：金牌選手羽生結弦的血與汗

隨住平昌冬奧嘅閉幕，從各地而來嘅選手們都紛紛返到自己嘅國家或者練習場地，當然備受矚目嘅羽生結弦(yuzu)都唔例外。雖然冬奧已經結束，但亦無減大眾對佢嘅關注。今之除咗可以畀大家回顧yuzu喺今屆冬奧嘅表現之餘，亦可以趁機瞭解一下依位衛冕男子單人花滑金牌得主嘅另一面。

(照片來源: team_nippon Instagram)

今屆冬奧之前yuzu因為喺大獎賽(GP)分站NHK杯嘅練習中受傷，所以直至奧運前都無參加任何賽事，喺fans嘅擔心下yuzu一直進行復健直至能夠上冰練習，完成比賽後亦摸左一摸受傷嘅右腳。喺賽後訪問中yuzu坦言賽前一直擔心受傷嘅事，甚至放棄左可以痊癒嘅想法。由索契冬奧到平昌冬奧四年間yuzu曾經病過，受傷過，甚至做過手術。羽生選手嘅成功可以話係由汗水同血所組成，當年中國杯嘅選手相撞亦屬其中之一，所以yuzu都提到對未來四年嘅盼望就係「健康大事」(健康好重要)。

(照片來源: team_nippon Instagram)

雖然yuzu喺其他賽後訪談中提及受傷後第一次落冰練習嘅時候覺得絕望之後笑左一笑，不過事實上為咗男子單人嘅比賽，yuzu除左要放棄出戰花滑團體賽之外，甚至要用上強效嘅止痛藥先可以完成整場賽事，一句「五輪のために色々なものを捨ててきた」(為了奧運放棄左唔少野) 亦再一次證明金牌得來不易。

另一句「明けない夜はない」(沒有永不破曉嘅夜晚) 亦指出yuzu嘅心情，賽前沉重嘅壓力轉化成練習嘅動力，又以「今までの人生の中で、一番幸せな瞬間をいただきました」(一直以來嘅人生中最幸福嘅時刻) 嚟形容自己嘅心情，並一次又一次喺訪問中感謝支持佢嘅人，以康復為重再一次定下新嘅目標。

(照片來源: team_nippon Instagram)

其實呢位金牌選手喺比賽之外亦有貪玩嘅一面。花滑選手們因為經常比賽所以都會變得熟絡，幾位選手就喺奧運花滑表演 (gala) 嘅練習中「練習」其他冬奧項目，包括短道速滑同冰壺。加上之前亦曾經同其他日本選手試跳早前大熱嘅「恋舞」，以上種種都表現出yuzu比賽場外獨有嘅一面。

(照片來源: 花滑選手 Misha Ge Instagram)

另外，如果有留意到嘅話，可能會知道yuzu比賽前會聽歌，重視音質嘅yuzu會試唔同嘅耳機同訂造個人耳機，平時亦會隨身帶住耳機，喺其中一次嘅採訪，就喺袋入面拎出十一個耳機，日常帶住十至十五個耳機就係為咗對應所聽嘅歌。而yuzu所聽嘅歌亦有唔少類型，喺賽後嘅小訪問中就提及到比賽前聽嘅，就係ONE OK ROCK嘅「完全感覺Dreamer」同和田光司嘅「風」。