食物廣告圖片只供參考，同實物有多少出入就梗嘅。不過呢家嘢就不局限於香港，原來就連個個讚好嘅日本都有同樣情況發生，仲要都幾離譜吓。
話說日本嘅人氣連鎖咖啡店DOUTOR最近新推出一款「ミラノサンド すき焼(米蘭三文治 壽喜燒)」。將和風壽喜燒融入西式三文治裡面，爽脆嘅生菜加上柔軟嘅牛肉同洋蔥嘅絕配，仲有蛋黃醬同九条蔥添。
呢張就係店方嘅宣傳圖片，見到係咪垂涎欲滴，想即刻大大啖咬落去呢？係日本就有勇者第一時間狗衝去買嚟嘗鮮。
不過係三文治送上台嘅果一刻，佢就心感不妙。「咦？我啲肉呢？」就咁睇表面，仲以為店員唔記得放肉入去。應該只係畀麵包遮住左啫，一定係咁除非唔係。
開…
嚟…
見…
我
唔_係掛！！咩野嚟咖！！咁_奀嘅！！！
當事人見到依個慘況不禁大嘆詐騙。又一個理想與現實嘅活生生例子。
其實基本上要加嘅配料都有齊，只係肉得一兩塊，仲要咁鬼薄，又真係有多少過分。有日本網民嘲諷「依種廣告係咪會構成欺詐罪？」「拍得住W記啲漢堡包」。
不過講返句公道說話，其實售價410yen唔算太貴，只要唔好有過分期望，都叫做可以充飢嘅（得啦，唔駛拖，自己走……）。
About Post Author
