虛擬角色打破次壁 二次元全息」老婆」接受訂購

[人類滅亡警報] [注意，本文內含高毒性內容，如閱讀後有任何異樣，請儘速與相熟現充相談] 「能夠打破次壁，同二次元嘅老婆喺現實一齊生活就好啦」呢個係宅宅一生嘅夢想，不過隨著科技愈來愈發達，呢個夢想已經開始成為現實。記得日本 Vinclu 公司年頭為一款以全息投影技術投射出虛擬角色同用家亙動嘅產品Gatebox眾籌嗎？

 

 

 

話說當時佢哋就係放咗以上3條概念影片出嚟，話咁快就籌到9000萬日圓商品化。Gatebox係一台筒形全像投影交流裝置，虛擬角色會投射到筒內透明薄膜螢幕上，營造角色漂浮於真實空間中嘅感覺(即係將Siri溝埋初音嘅瀨尿牛丸啦)，用家可以透過麥克風同動態感應器感應用家動作，亦可以同佢吹水傾計，甚至要佢每日「Morning Call」啊。

 

而除咗主要功能「賣萌」之外，其他功能都相當齊全喎，由於Gatebox具備 Wi-Fi、藍牙同紅外線通信技術，因此可以收集網路、手機同家電等裝置嘅資訊，甚至用電話互通短訊添或以紅外線嚟遙控其他家電，例如開電視同冷氣等。

 

Gatebox現時有提供虛擬女角色「逢妻光」同大家互動，而負責設計同監修「逢妻光」嘅就係有參與『心跳回憶』同『Love Plus』人設箕星太朗。

 

 

 

 

 

 GateBox今日已經開始美國同日本地區嘅預約，售價就俾一開始嘅估計足足貴咗3倍，即係連稅32萬1840日圓，而日本地區暫定預購量係300台左右，雖然未係好普及，但係日後一旦去到一人一機，到時冇人結婚真係人類滅亡都似。不過而家只係得一個角色，300人買返屋企做老婆咪即係入手即送299頂綠帽？