（聖誕注意）日本男性第一次約會地雷頭10名！

又到聖誕，又到聖誕！

今年聖誕又放4日，日本都連放3日，自然多人會想去啲特別嘅地方過一個特別嘅夜晩，聖誕夜…失…

另一方面，日本世紀21地產做咗個調査，訪問咗20-40歲男女600人，結果指有過半數人會自己一個人過…聖誕夜…獨身夜…？

嗱，唔好以為自己單身就以為聖誕同自己無關～

訪問入面仲有條問題問咗300個女仔，就係：如果有人喺聖誕約會向你表白，你會唔會接受？

有78％嘅女仔話會！成234人話會接受對方喺聖誕約會個陣嘅表白！

數字上喺聖誕約會時表白成功率係真係高啲！（車長老婆都係平安夜媾返黎！）

所以今次就講吓日本男性第一次約會地雷頭10名！中咗想翻身都幾難嚕！

個調査訪問咗300個20-59歳嘅女性！個問題就係：「同你第一次約會，有咩行為會令你絶對唔會同個男仔拍拖？」

第1位：傾緊計都不停望手機！54.3％

第2位：食野AA時，連1円都要計！42.7％

第3位：對店員態度欠佳或有啲惡！41.3％

第4位：情緒低落，好似唔開心咁！35％

第5位：食野食得好大聲！34.3％

第6位：冇任何聯絡遲到15分鐘以上！30％

第7位：返屋企個陣冇啲紳士應有嘅態度！28.7％

第8位：冇聽意見就決定食咩！17.3％

第9位：冇預先有多樣計畫，之後就亂咁黎！17％

第10位：冇減價折扣嘅店唔入去嘅人

第1位好多女性都好討厭傾緊計都不停望手機，最大原因係：「先生你第一次同我約會，我仲特登扮靚啲，你居然望電話都唔望多我2眼？你無X野下話？」
　
第2位多數嘅女性指：「我唔介出錢，但你唔好AA制到1円都同我計丫！」有其他女性指：「你俾晒我又覺得你大洗，都係AA好！」仲有。車長認為某程度上都難做…最好都係一個出大數一個俾零頭好。

第3位係近年先有：「對店員態度欠佳或有啲惡！跟本就係個人本身有問題！」

第7位返屋企個陣冇啲紳士應有嘅態度：「你唔送我返屋企冇問題，但都唔好話自己就快冇車返屋企，就咁走咗去坐車丫，你冇異心係好，但唔好連紳士應有嘅態度都冇丫，坐底你都送我上車丫！」

其實第一次兩個人約會可以睇得出好多野，唔係叫你呃人個陣呃埋自己，等自己100％完美，但都唔好完全展露原本嘅弱點出黎俾人睇丫。