對於長期徘徊喺貧窮線邊緣嘅小編嚟講，坐頭等去遠啲簡直同中六合彩一樣難……不過如果只係用一餐飯嘅價錢就可以換到同真係坐頭等有差唔多一樣嘅模擬飛行體驗，雖然知道唔係真，都會心郁郁想去試吓！
可以坐住頭等座位歎美食嘅就係開喺呢棟極不起眼嘅大廈入面嘅「FIRST AIRLINES」，齋睇個名真係會俾佢呃到，以為日本又有新嘅航空公司，其實呢度只係可以畀你坐喺模擬機艙入面用餐嘅餐廳，由於目的地有紐約、羅馬同巴黎3條國際航線可以揀，所以FIRST AIRLINES亦自稱為「池袋國際機場」。
FIRST AIRLINES嘅地理位置都幾方便，由池袋西口出發大概都只係5分鐘左右，但係行咗入大廈，莫講話機場，連一丁點飛機嘅感覺都冇！
不過一出?就開始有驚喜，FIRST AIRLINES嘅接待處已經出現喺眼前喇！
仲有埋個牌顯示每班航班出發嘅時間同目的地，開始感覺到佢地製作嘅認真態度啦！提返大家，如果想嚟呢度食返餐感受吓，記得一定要預約，仲要喺起飛前15分鐘到達辦理Check-in手續。
Check-in之後就可以正式進入機艙！入面其實唔係好大，只有8個頭等座位，唔講係咪完全唔記得自己其實仲身處舊大樓之中呢？
啲座位全部都係曾經喺真飛機中用過嘅退役座椅，所以坐起上嚟特別有feel，detail位全部都keep返喺度，坐上去真係有少少上咗飛機嘅感覺！
想知道自己坐緊嗰張凳曾經喺咩航機中用過，其實細心啲留意吓啲細位就會睇得到，好似呢張凳上面嘅條安全帶就印住土耳其航空嘅Logo，証明張凳曾經被土耳其航空使用。
搭飛機又點可以冇機票！「機票」上面印哂出發時間、航班編號、座位編號、目的地等等資料，係一份好值得留念嘅紀念品。
最正嘅係喺椅背竟然可以搵到機上安全守則等等資料，平時搭飛機幾乎掂都唔會掂嘅野，嚟到呢到反而會覺得好新奇！
航班差唔多要起飛，FIRST AIRLINES亦跟足一般航班做法，起飛前為大家提供逃生教學，平時望都唔望多兩眼嘅環節，嚟到呢到大家就係咁伸張條頸猛裝！
喺起飛之後，精彩節目陸續登場，乘客被分配VR BOX戴住嚟欣賞目的地360度嘅靚景，雖然唔係真係飛去紐約，但可以從8,000米高空虛擬睇景，超級難忘！
玩完VR BOX，終於開始派飛機餐！呢度嘅餐車都做到同真嘅幾乎一模一樣，加埋背景不停播住飛機嘅引擎聲，令到乘客越嚟越投入餐廳嘅設定之中。
首先係前菜，放到咁精緻，頭等果然係唔同啲！
主菜就有餡料多到滿瀉嘅漢堡包，整體嚟講比平時喺真飛機食到嘅飛機餐好食好多。
最後仲有New York Cheese Cake做甜品，食完哂三道菜，話咁快就己經到咗紐約機場，又係時候執野準備走啦～
FIRST AIRLINES除咗逢星二五會飛紐約、星期三六會飛羅馬之外，星期四日仲會飛巴黎，飛唔同目的地都可以試到唔同款式嘅飛機餐，仲可以透過VR BOX嚟遊覽各地名勝，對於好日都唔會搭飛機或者一世都唔會坐到頭等嘅人（小編講緊自己……）嚟講，真係一個幾特別嘅體驗！
FIRST AIRLINES
地址：東京都豊島区西池袋3丁目31-5 パークハイムウエストビル8F
電話：03-6907-0981
營業時間：星期一至五 17:30-23:00、星期六日及公眾假期 15:00-23:00
官網：firstairlines.jp
資料來源：4travel.jp
About Post Author
