極上味覺糖多重嚴選蜜柑超美味

鍾意食味覺糖嘅朋友，相信都會試過晒各種唔同口味！繼之前人氣盛極一時嘅三文魚味味覺糖(好唔好食就有啲難評價，口味這回事……始終很個人的)…依家推出咗超好食嘅「極上蜜柑Puccho」！1月頭朝日電視台一個日本節目「ソノサキ」就採訪咗製造依款糖嘅農場同工場，睇哂成個蜜柑採集、同嚴選美味蜜柑嘅過程。睇完之後真係覺得好想食，想食到就嚟衝落街買啊！到底有幾好食？我地嚟睇下佢地點樣生產依隻糖啦！

送到工場嘅蜜柑

(出處：朝日電視台《ソノサキ》)

其實，一日由農場送到工場嘅密柑有大約15萬個，當中可以成為「極上蜜柑Puccho」嘅，只有當中20%以下嘅嚴選蜜柑。咁大家就知道依隻極上味覺糖用嘅蜜柑有幾嚴格，有味道保證啊！咁佢係點樣嚴選好食嘅蜜柑嘅呢？

第一關：大小測試

(出處：朝日電視台《ソノサキ》)

第一關，就係睇下蜜柑是否到達「極上蜜柑」嘅大小標準。工廠嘅生產線上面開咗直徑4.5cm嘅洞，如果蜜柑大過4.5cm，當然可以過到關成為候選極上蜜柑，但如果小於4.5cm就會跌落洞中，過唔到下一關。順帶一提，如果密柑係4.5cm以下，就會成為啫喱之類嘅加工品。

第二關：甜度測試

(出處：朝日電視台《ソノサキ》)

過咗大小果一關，下一關就會測試蜜柑嘅甜度足唔足夠。佢地用光嘅穿透率測試，糖份越高嘅密柑，光嘅穿透率越低，相反亦如是。依個機械仲會仔細分開唔同甜度嘅密柑，最普通嘅甜度係10度左右，而最高嘅特選甜度就係12度以上，大約係蜜桃同芒果嘅甜度。選做特選蜜柑嘅，大約全體中只有2成，將會攞嚟做味覺糖。依啲就算少少份量都可以引出濃厚味道嘅蜜柑，睇落真係好好食啊。

人手剝皮工序

蜜柑通過所有以上測試，就可喜可賀成為咗嚴選蜜柑啦！以下依啲蜜柑將會送去果汁工場，集中搾汁工序。