有假都唔敢攞唔敢放，唔知香港嘅打工仔會唔會理解呢種心情呢？
Expedia Japan於12月15日公佈世界28個國家嘅國際比較調查，發現日本嘅「攞有薪假期」比率係排最低。呢個咁sad嘅結果喺網絡上引起激烈討論。
根據調查顯示，原本2013年後，日本嘅「消耗有薪假期日數比率」排名有明顯上升傾向。但今年居然由60%突然下降到得番50%，令日本時隔3年再次成為最低分。之後就係韓國嘅53%同印度嘅71%等。
Expedia都有問日本人唔拎假嘅原因，第一位嘅理由係「人手不足」、之後就係「因為同事都冇得放」同埋第三位「因為冇錢」。
當然，呢個結果引起好多網民話好明顯就係因為日本多黑心企業長期榨乾自己嘅員工。不過另外都有人質疑其實唔敢拎有薪假係日本人嘅職場精神論影響！又話日本人比較捨私奉公、責任感強，同埋會擔心冇咗自己會帶咩麻煩俾公司，所以先會搞成咁。（上圖為「如果拎有薪假會覺得有罪惡感」嘅人嘅比率。）
小編有個日本朋友，如果週末出去玩甚至去短途旅行，畀同事知道咗嘅話會被人閒言閒語好耐，話佢成日好幸福可以去旅行去玩、而上司亦覺得佢淨係識得玩，仲叫佢檢點啲…某程度上都幾病態。大家真係要好好珍惜會俾你放leave嘅公司喇…（社畜心態/_\）
更詳細調查結果及資料來源：Expedia Japan
About Post Author
