【懶洋洋限定〜(￣∇￣)ノ】蛋黃哥由關西殺到上東京！

 

終於唔使特登去到關西咁遠都可以同蛋黃哥嚟個親密接觸啦，因為喺11月至1月，位於西武池袋8樓嘅Dinning Park會同Sanrio超人氣嘅蛋黃哥合作，開設2個月期間限定嘅「蛋黃哥Cafe 池袋店」，到時唔單止可以食到關西店嘅菜式，仲有池袋店限定甜品，款款都超懶洋洋，蛋黃哥嘅鐵粉聽到呢個消息一定開心到震！

 

「蛋黃哥白咖喱飯」喺關西店都可以食到，辣辣地口感好Creamy，成個蛋黃哥扒咗喺甘面咁得意，有啲唔係好捨得食佢添～

 

「烤牛肉山丼飯」啲牛肉堆到成座山仔咁！蛋黃哥，你坐正喺上面我點食！？

 

呢個「超多水果荷包PANCAKE」係池袋店限定甜品，面頭有蛋黃哥成隻荷包蛋咁喺度坐鎮，PANCAKE入面夾住咗超多生果，必食！

 

除咗熱食同甜品，店入仲有好多款蛋黃哥飲品，無論你叫咩都好，只要喺店內消費，店方都會送張蛋黃哥postcard畀你留念，一共有3款，不過冇得揀款同數量有限，要儲齊一套唯有去多幾次啦～

 

 

蛋黃哥雪糕抹茶LATTE ¥800

 

食完記得唔好咁快走住，因為池袋店特設影相位畀你同蛋黃哥嚟返個世紀完美合照，又食又拎，呢啲咪叫完美的一天囉！