【悲報】成宮寬貴宣布從藝能界引退

勁sad。經歷過一輪被懷疑吸毒騷動後，成宮寬貴今日正式發表聲明宣布從藝能界引退，原因係因為被身邊朋友出賣私人生活，令佢感到繼續從事演藝界將無法再相信身邊嘅人…唉。另外今日較早前佢嘅事務所到已經公佈驗尿結果呈陰性，證實成宮係清白嘅…先睇睇成宮手寫聲明嘅內容。

（大致翻譯內容如下）

今次事件所有起因都係因為我自己，我本人非常明白。我被從心底裡信任嘅幾位朋友出賣，被陷於不義。

今次被公佈嘅係我從事呢份工作絕對唔想被人知道嘅私人生活嘅一面，一諗到如果呢個錯誤嘅情報繼續被傳揚，我實在快要被言語不能表達嘅不安、恐懼及絕望感壓倒。

我實在不能再忍耐以後自己嘅私人生活被人惡意地暴露畀公眾。

我已經即刻想喺藝能界消失。就算我以後喺演藝界嘅舞台上立足，我都會為有關人士或對我身邊嘅人帶嚟麻煩，我覺得實在太抱歉。除咗快啲離開演藝界之外，我實在諗唔到其他方法。

真係好感激各位相關人士將我從乜都冇培育到今時今日嘅我。對於支持我嘅各位粉絲，請原諒我要以咁嘅形式去離開。

真係非常抱歉。然後，一路而來，真的非常謝謝大家。

2016．12．8　成宮寬貴

以上為小編非官方不負責任翻譯內容。如跟原文差少少意思，請見諒。

另外，呢封信簡直委屈到要喊出嚟。一本不負責任嘅八卦雜誌報嘅內容摧毀咗一個前途無可限量嘅演員嘅生涯，仲要令佢對身邊嘅朋友失去信任。成宮寬貴嘅口吻疑似指今次係朋友嘅陷阱，真係好慘呀！！

報道出咗仲要有人話Friday如果唔係有確實根據都唔會報出嚟，仲引導大眾指成宮可能真係有吸毒，其實真係好sad。作為一個支持者我只能希望成宮早日走出呢個陰霾…睇嚟今年日本藝能界去到最後一刻都要衰收尾…