上野熊貓發情帶挈股價急上升？！

尋日，日本電視台NHK就報道喺上野動物園內嘅熊貓力力（雄性）同真真（雌性）步入發情期，有機會今年再度繁殖！兩隻11歲嘅熊貓對上一次係2012年交配成功生BB嘅～之後都冇乜動靜，所以今次女仔嘅真真再次出現發情先兆令園方非常驚喜，並開始為兩隻熊貓嘅繁殖作出準備。

最搞笑嘅係，知道消息之後最開心嘅並唔係熊貓迷或者動物園方，而係因為呢單新聞帶挈股價直線上升嘅一間專門開中華料理店嘅「東天紅」股票公司！一日內首先比前日股價升幅達14.3%（192Yen），成為本年度最高紀錄。後來回穩後收市報168Yen，升幅仍然有6.3%！點解呢？原來東天紅嘅餐廳位於離上野動物園好近嘅不忍池，如果熊貓成功再生BB，將會引嚟大量遊客入園觀光，增加附近人流。