有咩比食到一個超好味嘅即開海膽更開心呢？就係用至抵價食到一個超好味嘅即開海膽啦！
宮城縣南三陸さんさん商店街有間魚屋ROYAL FISH專賣新鮮刺身，海膽都係700至900円左右，見唔見到啲海膽肉爆晒出嚟啊！！！
成塊夾起都唔會散，入口即溶好creamy，仲要好好好鮮甜㖭啊！
帆立貝仲抵，380円有大大隻即開帆立貝，為咗方便夾起仲已經起好晒啲肉，切埋做4塊！
食落果然係好實肉，唔似平時腍滋滋嗰啲咁，味道好清甜～～～
估唔到新鮮嘅帆立貝群邊可以脆到咁！好似平時喺酒樓食海哲嘅口感，但係每一啖都有啲海鮮甜味喺牙縫到標返出嚟～～～正啊～～
依到仲有好多其他刺身，例如八爪魚、三文魚籽等，例外又會有鰻魚飯、燒帆立貝等等熟食，非常推薦大家嚟幫襯！
關於南三陸さんさん商店街
宮城縣喺311大地震時，好多地方都受到破壞…但憑住大家點都唔放棄嘅精神，依間魚屋所在嘅「南三陸さんさん商店街」亦都愈來愈興旺啦～
南三陸さんさん商店街入面，一共有28間店舖，其中好似「魚屋ROYAL FISH」咁嘅水產店就有5間，另外仲有8間餐廳同幾間手信舖㖭！
商店街內 平食高級海鮮丼
去得日本沿海地方，點可以唔食返幾餐海鮮丼！南三陸さんさん商店街入面有5間店舖，包括「食楽 しお彩」、「かいせんどころ梁」、「創菜旬魚 はしもと」、「山内鮮魚店」、「弁慶鮨」等，都有提供又平又好味嘅「南三陸キラキラ丼」（按入去有得睇menu！）～嚟緊秋天就到，睇吓由9月1日到10月31日限定嘅「キラキラ秋旨丼」幾吸引！！！（約1700至2000円左右）
由仙台踏高速巴士去BRT志津川駅就可以去到南三陸さんさん商店街（巴士時間表），希望大家都會身體力行去支持佢地，令更多人知道依到嘅海膽有幾咁令人念念不忘，耿耿於懷啦～～～
ロイヤルフィッシュ（魚屋ROYAL FISH）
營業時間：09：00 －18：00
休息：星期三
About Post Author
