唔經唔覺1960年6月3日創立嘅著名電子遊戲公司SEGA已經57歲啦！ 雖然自從Dreamcast一役之後SEGA已經專注喺遊戲製作上，對唔少人嚟講都係一個遺憾，不過SEGA出產嘅遊戲好多都係令人難忘嘅名作。以下介紹幾款喺唔同年代都稱得上為有代表性嘅遊戲作品。(排名不分先後，代表作太多，如電腦戰機等各種名作如未有介紹敬請見諒)
亞歷斯小子系列
好多人諗起SEGA GAMES第一件事都係諗起超音鼠，但喺超音鼠面世之前，SEGA其實已經有呢隻《亞歷斯小子》系列用嚟頂住隔離嘅超級瑪利歐系列。
呢個系列有6個作品，但自從《超音鼠》面世後，就無再出新作。有人話，如果超音鼠算係SEGA GAMES嘅爸爸，咁《亞歷斯小子》就肯定係SEGA GAMES嘅爺爺。
SEGA有好幾款遊戲亦都會有Alex Kidd客串登場，甚至會喺後輩超音鼠擔正嘅ALLSTAR遊戲擔任隱藏角色！
VR快打(VF)系列
正所謂『2D打街霸，3D打VF』，要數當年嘅街機格鬥GAME，能夠同街霸齊名嘅格鬥遊戲肯定係VF啦。1993年首次面市嘅《VF》，如果唔計移植版，現時為止出到第5集。不過日方已經喺2017年3月停止埋街機版嘅修理支援。家用版則一切如常。
莎木系列
莎木系列首集係喺1999年推出，曾經係電子遊戲中開發費用最高嘅一款遊戲(70億日圓)，一路直至《GTA4》(100億日圓)才能打破這項健力氏世界記錄。未推出時已經被眾多雜誌報導過，被期待成為DREAMCAST可以逆轉反勝到PS2嘅關鍵遊戲。
不過除咗有人批評每集嘅故事量不足之外，第2集推出(2003年)更加係當時莎木嘅遊戲機平台DREAMCAST已經係末期遊戲機平台，DREAMCAST呢幾年被PS2窮追猛打下早已回天乏力，因此莎木可謂令SEGA正式退出遊戲機市場嘅最後一個因素——令SEGA元氣大傷。
CHECK！ VR快打與莎木
呢2隻遊戲都係由同一位製作人鈴木裕製作。VR快打系列喺街機相當成功，VR快打2更加係當時街機嘅寵兒，為SEGA賺取左大量嘅資金。莎木起初嘅企劃，其實就係VR快打系列主角結城晶嘅RPG外傳遊戲，但後來多次經上層多次「建議」後呢項設定就完全無左，成為一個新嘅獨立計劃。另外遊戲機平台亦都由一開始嘅SEGA SATURN變為DREAMCAST。因為莎木系列叫好唔叫座嘅關係，鈴木裕又再次專心VR快打系列，希望挽回SEGA嘅對自己嘅信心，不過最後都係難逃被雪藏嘅命運。
櫻花大戰系列
櫻花大戰首集推出嘅年份係1996年，以至2005年系列作共有5集。(未計其他外傳式作品)。本作融合文字冒險遊戲AVG以及策略模擬遊戲SLG，加上作中處處可以睇到日本寶塚歌劇文化要素，令櫻花大戰系列大熱。除眾多外傳遊戲作品以外，櫻花大戰更加被改篇為漫畫、動畫、音樂劇、舞台劇，平台眾多。因此相信有人即使未接觸過遊戲本身，也可能會認識到這個系列。
夢幻之星系列
SEGA首次嘗試嘅家用遊戲機ONLINE GAME。不過最近聽到有人話夢幻之星本來就係ONLINE嚟，其實首4作(1987年至1993年於Mega Drive推出)都係單人RPG，到咗2000年先正式推出DC以及WINDOWS嘅網絡版。單人RPG嘅夢幻之星於當年嚟講設定相當劃時代而令人印象深刻，亦算係Mega Drive平台上SEGA嘅代表作。
飛天幽夢系列
首集喺1996年SEGA SATURN平台上推出。由SEGA內部曾經開發過《超音鼠》嘅SONIC TEAM負責製作。特點係叫做A-LIFE嘅善惡系統，同埋猶如置身半空一樣嘅飛行嘅2、3D混合操作。另外本作出咗個“聖誕夜 冬季限定版”，會因應現實日期而令遊戲產生變化，例如聖誕節當日會見到角色換上聖誕裝。
人中之龍(如龍)系列
近年提起SEGA一定唔少得嘅作品，2005年推出第1集，截至2016年12月已經賣左900萬套嘅系列，相信各位機迷都唔會對呢隻日本黑幫動作遊戲陌生。除咗動作呢個賣點之外，仲有好多小遊戲同埋寫實嘅地圖，令你好似真係置身於日本嘅繁華街道一樣。除咗本篇之外，有時候都會推出一啲沿用返原作角色外觀、個性設定，將佢地放落古代嘅遊戲，亦都相當受歡迎。(但打喪屍就…)
女武神系列
第1集係喺PS3上2008年推出嘅戰略RPG。其實SEGA呢段時期表現相當低迷，被本作推一推後逐漸又回勇。本作最大嘅特點，係雖然佢係戰略模擬RPG，但係能夠作出好似第三身射擊遊戲TPS一樣嘅操作(HEADSHOT會有傷害加乘)。本作甚至被健力氏世界紀錄選為PS3最佳戰略RPG遊戲。
超音鼠系列
由1990年推出至今，由佢擔正做主角嘅遊戲總共賣左9000萬套。係SEGA開發嘅遊戲入面最具代表性嘅一隻遊戲。主角超音鼠亦係SEGA公司嘅吉祥物。除咗電子遊戲界外，經常會出現喺某啲廣告，仲客串過2012年迪士尼嘅無敵破壞王添！ 另外亦經常拎嚟同任天堂嘅瑪利歐一齊做宣傳，仲喺wii度推出過超音鼠同瑪利歐一齊推廣奧運嘅遊戲。能同瑪利歐齊名，亦都可見超音鼠地位真係唔低架。
About Post Author
