Like Japan 山梨Plan 8 天婦羅名店即叫即炸超巨型天婦羅丼飯

客人面前即叫即炸天婦羅

最好食嘅天婦羅，一定係即叫即炸嘅天婦羅！山梨縣依間天富羅店「富士天婦羅いだ天」出晒名喺客人面前即叫即炸，再逐件逐件新鮮滾熱辣地放喺客人面前～唔怪之一講起去山梨食天婦羅的話個個都推薦依到啦～

————————–

「冇食過雞泡魚嘅人冇資格睇富士山」？

富士天婦羅いだ天嘅menu同店面上都寫住一句詩句，就係「冇食過雞泡魚嘅人冇資格睇富士山」，因為如果你連食雞泡魚嘅勇氣都冇嘅話，就冇資格欣賞偉大嘅富士山咁話～店長非常推薦大家食雞泡魚料理，而いだ天依到嘅名物正正就係雞泡魚天婦羅啦w 小編食過幾次雞泡魚，但當中最能夠將雞泡魚炸到軟腍腍而不失鮮味嘅就只有依間いだ天！當然一場嚟到無理由淨係叫一件雞泡魚天婦羅㗎，所以推介大家叫依個「冨士天盛り合わせ」（880円），咁就一次過可以試到晒雞泡魚、大蝦、溫泉蛋同3種野菜天婦羅啦～全部都材料新鮮、即叫即炸，皮薄餡靚㗎～

冨士天盛り合わせ 880円

————————–

3人同行必食超巨型天婦羅丼飯

いだ天仲有樣招牌菜，就係得依到先有得叫嘅超巨型天婦羅丼飯「富士山天丼」（3000円）啦～個飯設計到成座金字塔咁嘅形狀，其他佢係以富士山為原形炮製出嚟㗎～除咗外形似富士山之外，個飯嘅內層頂部仲包咗件三文魚籽壽司，係咪同火山嘅熔岩有幾分相似呢～啲天婦羅有幾好味我諗就唔洗再多講啦，但最令mika印象深刻嘅其實係個有味飯！原來飯入面撈咗啲類似菜脯嘅漬物同櫻花蝦，加上甜甜地嘅秘制醬汁，令成個飯加晒分，超級大推！