山梨縣除咗出名富士山同水果之外，位於山梨縣南面嘅身延町仲係西嶋和紙嘅故鄉㖭！今日我就同2個朋友一齊嚟到「身延町なかとみ和紙の里」挑戰和紙枱燈體驗班啦～～～
——————————————
和紙枱燈體驗班收費及詳情：
價錢：2100円（連電掣及燈座）
製作時間：30分鐘
風乾時間：40分鐘
——————————————
西嶋和紙 用途廣泛
西嶋和紙嘅原材料係一種叫三椏嘅植物，質地薄得嚟好堅韌，可以保存好多年都得～所以除咗一般書寫用途之外，西嶋和紙仲可以用嚟整各種各樣嘅飾物，甚至係書套、銀包等等㗎～喺「身延町なかとみ和紙の里」入面嘅「紙屋なかとみ」可以搵到好多用西嶋和紙整嘅手信，包保大家停唔到手啊～
——————————————
和紙體驗 直擊報導！
步驟1 篩走紙漿多餘水份
著好晒圍裙之後，師傅就會教我地將啲紙漿倒喺個漉網上面，再用雙手拎住漉網嘅木框，均勻咁將多餘嘅水份篩走～一開頭我以為好簡單，點知原來一大力得滯啲紙漿就會倒瀉，力度唔平均又會搞到張紙又厚又薄…不過師傅會一直傍住大家，所以都唔洗擔心^^
——————————————
步驟2 繪畫圖案＋裝飾
一直都以為和紙上面嘅圖案係用普通顏色畫出嚟…原來係錯嘅！和紙上嘅花紋其實係用加咗顏料嘅紙漿整出嚟㗎～畫圖案時要用吸管吸起加咗顏料嘅紙漿，擠喺白色嘅和紙上面，畫出自己鍾意嘅圖案～菜鳥mika好渣…唔係好識控制枝吸管，但係南條愛佳就畫到成幅masterpiece咁，好犀利！！！！
好彩唔識畫畫都可以貼啲裝飾上去補救～將楓葉等等裝飾黏喺和紙上面之後係咪即刻加晒分呢～（仲要失敗率0％啊！）
——————————————
步驟3 風乾
整好晒之後師傅就會將成塊漉網拎去機器到風乾，再放喺乾燥機入面等40分鐘左右～依段時間大家可以去旁面嘅手信鋪或者餐廳買吓手信食吓嘢～
——————————————
步驟4 上燈
風乾完成之後，師傅就會幫我地將信紙裝上燈座，咁就大功告成啦～～～雖然最後師傅話我地第三名包尾，不過可以親手整到屬於自己嘅和紙燈真係好開心～（而且我覺得自己明明整得好靚！！！！w）
其實依到除咗有得整和紙枱燈之外，仲有好多樣和紙製品可以整㗎～
想知道更多關於身延町なかとみ和紙の里嘅體驗班可以上佢地個官網睇吓～～
——————————————
交通小貼士
從新宿搭京王高速巴士／山梨交通巴士去到西嶋（和紙之里）前，一落車就見到㗎啦～
京王高速巴士電話：03 5376 2222
山梨交通巴士電話：055 237 0135
——————————————
身延町なかとみ和紙の里
地址：山梨県南巨摩郡身延町西嶋345
時間：9：00am－5：00pm
About Post Author
