日式夜總會，打機睇日劇就見得多喇，但大家其實對呢個topic嘅認識有幾深呢？
日本陪酒女郎呢個行業係鼎盛、定係人才短缺？陪酒女郎同風俗、妓女原來大所不同，賣酒唔賣身到底又搵到幾多錢呢？
嚟緊一系列嘅《Like Japan放送室》會同大家探討下日本嘅陪酒女郎文化。
今日先為大家介紹，喺日本有專門搵part-time陪酒女郎嘅公司㗎！
呢間叫「MORE」嘅公司，透過網站幫助有興趣兼職做陪酒女郎嘅女仔同有需要嘅夜總會配對，成個系統喺日文就叫「派遣キャバ嬢」。負責人春木先生話我哋知，網站成立至今已有7000多個女性使用，每個月會多200個新嘅用戶登記添。做派遣比做全職或專屬陪酒女郎好嘅地方包括：可以彈性上班（會根據用戶希望嘅時間安排更表）、可以即日領取薪金、唔需要達成店舖嘅目標業績（無業績壓力）、最緊要係無經驗都可以做～
咁到底係咪咩人都可以去做嘅呢？春木先生話其實有條件架！如果面試嘅時候啲女唔識答問題、講嘢好細聲、或者連敬語都講唔好，達唔到基本水準嘅要求就無得做。另外，佢話用戶最多係20－25歲，其次就係26－30歲；偶爾都會有啲18、19歲嘅女仔登記。除咗大部份用家本身有正職、都係想做派遣搵下外快之外，偶爾都會有啲同藝能界有關嘅女仔嚟登記架！佢仲話試過有AV女優嚟登記，嚇咗一嚇添！
咁到底做派遣陪酒女郎搵到幾多錢呢？其實每間舖頭開嘅價都唔同：一般都係時薪3000yen至3500yen，但好似六本木或新宿、甚至銀座等高級啲嘅地方就可能有4000yen或以上嘅時薪。之但係，有啲舖頭可能會收取提供俾你嘅衣裝費，所以話就話4000，有機會抽返你2000yen嘅「行政費用」架！
咁點解會有咁多女仔做陪酒女郎？當然每個行業都有賺錢嘅「捷徑」…
我哋下集會搵嚟真係做緊派遣嘅陪酒嘅Risa同我哋爆大鑊，睇番片尾我個樣係名副其實嘅O晒嘴！到底佢同我講咗啲乜？下回分曉！
特別鳴謝：キャバクラ派遣More 全力協助拍攝
網址：ccccc.biz
About Post Author
