8月17日動畫黨惡夢嘅「漫無止境的8月」開始。

之前趁七夕提過《竹葉狂想曲》對於《涼宮春日的消失》嚟講有幾重要，今次就輪到唔少動畫黨嘅惡夢——《漫無止境的8月》。

時間上《漫無止境的8月》係《竹葉狂想曲》後嘅1個月加10日——即係8月17日開始，SOS團團長涼宮春日突然喺暑假結束之前召集4位成員，(強制)要求同團員喺9月開學之前，盡情享受暑假。但期間男主角阿虛成日都覺得呢樣野做過，嗰樣野睇過(既視感)，開口問超能力者古泉一樹，佢亦都回答有類似情況。

同一樣嘅劇情，換件衫又嚟過

終於去到某日半夜，阿虛畀未來人朝比奈實玖瑠慌慌張張咁叫左出嚟，至發現世界正由8月17日至8月31日之間輪徊——當踏入31日結束嘅一刻，世界就會重置返去8月17日嘅凌晨零時零分。

所謂重置，就係全世界嘅人，包括元凶涼宮春日本人都會失去左呢15日嘅記憶，將所有野包括宇宙法則還原到17日時嘅情況。根據資訊統合思念體對有機生命體接觸用人型界面嘅長門有希所講，重置已經發生過15498次(動畫版為15532次)，當中察覺到呢個現象嘅次數總共有8769次，各成員主動尋找擺脫重置嘅方法都失敗。

雖然15498次嘅阿虛同古泉亦都一樣，但毫無頭緒。直至8月30日喺家庭餐廳聚腳時，涼宮春日宣佈嘅然做晒佢想喺暑假做嘅野，呢日同最後一日應該要休息。臨別解散之際，阿虛突然醒起暑期功課仲未做完，仲叫左出嚟。原來假期臨完之前一齊做暑期功課對於成績優秀嘅涼宮春日嚟講係未曾試過嘅經驗，於是SOS團8月31日就喺阿虛屋企一齊渡過，做完功課嘅阿虛，亦都成功脫離循環，踏入9月1日。

《漫無止境的8月》可以話係SOS團最困難嘅一次危機(某程度上比後來更大規模嘅《消失》以及驚險嘅《驚愕》嚟得更嚴重)。其中一直以來SOS團上上下下都靠晒佢嘅身為外星人嘅長門大明神雖然能夠喺重置循環入面倖免於難，但係一來基於長門嘅立場唔能夠主動向其餘3位成員提出今次異變，二來更正因為佢記錄晒15498次循環，令到長門發生左嚴重嘅BUG錯誤，導致《消失》嘅事件發生。由後來長門同朝比奈大人版嘅口吻得知，似乎《竹葉狂想曲》、《漫無止境的8月》、《涼宮春日的消失》一連串事件——或者《涼宮春日》系列所有嘅長中短篇，對於《涼宮春日》世界嚟講都係唔可以避免。但究竟有咩野意義，呢樣真係要請谷川流老師喺續篇講解…如果佢仲肯寫嘅話。