首先，介紹得一定要自己用過先，用過仲要好用嘅真係唔多，
所以今次就嚴選咗幾樣【堅・好用】藥妝產品，
再同大家做個詳細分享～ 而家香港好多地方都有賣日本藥妝，
但去日本買就一定平d，咁就可以大量入手啦！
而以下介紹嘅都係我自己去親日本都必買嘅產品，
整理左好耐，希望你地會鍾意啦！
好，廢話少講，即刻開始！
1. 【防曬噴霧】
就黎夏天，女仔防曬一定唔少得，
呢兩款（KOSE & Biore）我都十分推介！
雖然女仔係會好天真(定得我)咁想用咗防曬可以完全唔會曬黑，
但其實係冇可能的(⋯⋯)，防曬嘅用途只係防止你曬傷，
但有d產品係一曬就黑得好快，冇乜防護性。
呢兩款都係我呢兩年夏天跟身嘅防曬，
我覺得兩款都做到令曬黑時間拖慢，
so far 噴左再去玩，一日唔會黑好多，自己覺得幾有用㗎！
唔用防曬乳液係因為我覺得噴霧方便d，我比較懶～哈哈
2. 【面膜】
面膜平時主要我會揀美白功效嘅，因為成日買埋好多保濕面膜，
但一得閒敷都只會拎起美白嘅面膜～
其實我知道係要做好保濕先敷美白面膜，
但我真係好想美白(有冇人有同感)
以上兩款係呢幾年keep住用完又用，覺得真係平又好用嘅產品。
深層美白呢隻之前好耐冇用擺左喺角落，
之後有次冇晒面膜先拎番出黎，
一用完係即刻覺得白左，推薦唷～
當然，面膜係要keep住用先有效，
但為左靚要用多d時間都冇辦法啦～
3. 【休足時間】
其實呢款已經好多人推介過，但都係想講下！
因為我之前係一去到日本就會即買一盒喺旅行期間用，
行完成日之後貼番張，第2日唔會腳痺腳痛。
而我自己除左用佢黎貼腳，仲會用黎貼手，可能拎咗成日野，
手都會好酸，貼完第2日會好舒服～
我覺得佢係屬於溫和性，張貼好軟，
唔會話痴到皮膚好緊好痛，呢個先係重點！
4. 【中村足美人足貼】
足貼顧名思義就係貼腳底嘅，
佢可以通過皮膚將身體內嘅毒素排出體外，
減輕由毒素累積所造成嘅疼痛同各種不適。
咁通常我都會瞓覺前貼，起身就撕咗去再洗腳。
其實自己好鍾意呢個貼，入手左好多次，
因為用完第2朝洗埋腳會覺得好清爽乾淨～隻腳輕左嘅感覺(?)
不過係咪真係排咗d毒素你係唔知㗎嘛，但塊貼用完會好污糟，
果d可能就係你身體排出嘅[毒素]啦～
可以買黎試下用下都唔錯嘅！
5.【陰影粉】
CANMAKE呢個牌子出名平，
喺日本買嘅價錢可能係香港嘅一半，
而自己就最常用佢嘅陰影粉，用左至少5年㗎！
呢隻陰影粉上色容易又keep得耐，最緊要係自然，
已經用到換左幾盒～ 如果去開日本真係可以買黎試下！
但CANMAKE嘅胭脂個人就覺得麻麻地，keep唔到耐。
6.【保濕爽膚水&乳液】
因為自己係敏感肌，好驚買倒刺激皮膚嘅產品，
呢隻MUJI自己轉用左個幾月，幾乾爽又保濕。
呢款係取自日本岩手縣釜石天然水製成嘅肌膚保養系列，
低刺激性，提供乾燥敏感肌高度潤澤。仲要係無香料無色素㗎～
佢呢個系列可以揀：清爽/滋潤/保濕，
咁就可以揀番岩自己果款啦！
7. 【卸妝產品】
卸妝自己一定會揀唔洗卸完再洗面嘅產品(因為懶⋯)，
有試過shu uemura卸妝油，都幾好用不過價錢唔經濟。
所以會推介Bifesta嘅產品，佢嘅卸妝油自己用過，
粉紅色呢枝保濕卸妝油會特別推介，卸完皮膚唔會乾好保濕～
而最右面果枝都會推介，佢係用黎卸眼妝嘅，
倒少少喺卸妝棉再覆蓋眼睛幾秒，就可以卸得好乾淨㗎啦
＝＝＝＝＝＝＝＝＝＝＝＝
P.S.(xanga time) 因為產品對每個人功效發揮性唔一樣，
所以如果有用過以上邊d覺得冇用嘅話都可以留言講下，
等大家有個意見參考下嘛～
其實本來有諗過講埋我覺得唔好用嘅產品，
如果大家想睇就留言俾我啦！下次見～
About Post Author
