2003年5月6日，特生自衛隊嘅『3式機龍(機械哥斯拉)』(Type-3 Multi Purpose Fighting System)正式投入測試。機體身高60米，以1954年哥斯拉嘅骸骨為骨架開發，同時由骸骨中抽取其基因造出生物電腦進行DNA運算控制機體。測試結果發表當日哥斯拉於横濱・八景島登陸，機龍奉命出擊。不過機龍與哥斯拉作戰時卻萌生自我意識而不受控制，最後唔止畀哥斯拉走甩，仲四處破壞，令機龍作戰計劃陷於停擺……
設定上嘅「千禧版」版3式機龍，係喺2003年由特生自衛隊(對特殊生物自衛隊)研發而成。劇中稱之為「3式機龍」或者係「機龍」，正式名稱為「3式多目的戰鬥系統」。至於「機械哥斯拉」呢個名稱，只係得『哥斯拉×機械哥斯拉』裡面3式機龍其中一個開發人員——湯原德光，以及佢個女沙羅曾經咁樣稱呼過。
機械哥斯拉體內雖然有3個維護台，分別喺機械哥斯拉嘅頸同腿，維護台係可以好似機械人嘅駕駛倉咁直接操控佢嘅身體。不過戰鬥時如果有人類留喺機械哥斯拉嘅話，會因為機械哥斯拉嘅加速力同衝擊力而致命，所以實際上根本無法好似機械人一樣直接坐上去，換言之只能靠搖控。除咗係佢嘅搖控器，同時好似充電等亦都要專用支援飛機「AC-3 白鷺」。不過最後由於「3式機龍」喺戰鬥中受損及能源不足，最後都係要女主角家城茜直接進入維護台操縱。
唔好以為「3式機龍」會好遲鈍。雖然佢喺有個裝著導彈、磁軌炮等武裝背包嘅「重武裝型」時係難郁左少少，不過一旦除咗個背包，進入「高機動型」，就要打要跳範範掂，唔靠武器，赤手空拳嘅動作仲有靈活過哥斯拉嘅一面。不過嘅然係機械，仲要咁大型，自然係故障多多。所以實際上劇中嘅「3式機龍」之所以險象環生，往往都係因為機件故障。
「3式機龍」嘅武器數埋數埋就真係唔少，其中包括﹕
99式2連裝鎂射線砲
安裝於口腔內嘅小型鎂射線砲。出力雖然唔高、不過因應鎂射線嘅共振作用破壊力可達90式鎂射線殺獸車嘅240%。
0式磁軌砲
裝備於下腕部，可高速連射。威力較低，主要用於先制攻撃同牽制
鎂劍刃
內藏於0式磁軌砲組件嘅小型劍刃。刺入對方身體内部後可放出電流。
多連裝火箭砲
安裝於背包組件嘅MRL・2MkIV 680mm火箭砲。
95式470mm多用途制導導彈
內藏於背包組件，屬曲射彈道嘅小型飛彈。改修後改為裝備98式320mm多用途
3式絕對零度砲
最後，講起3式機龍嘅殺著，就一定要數「3式絕對零度砲」。「3式絕對零度砲」可以將對方及週圍嘅溫度降至絕對零度，然後再用共振粉碎對方。不過「3式絕對零度砲」一開就要用3式機龍40%嘅能源，對於充電式嘅3式機龍嚟講相當致命，但係攝氏負273.15度嘅絕對零度光彈一炮就可以令到哥斯拉挾住尾巴走，呢一幕都算相當經典。不過射完呢一砲之後，成支砲就廢左，之後因為無預算修理，直接拆走埋。話雖係劇情需要，但打唔贏隻怪獸你就真係全家富貴，咁都唔肯「科水」就真係有啲搞笑……
About Post Author
