1973年4月24日,東京爆發鐵道史上一大嚴重騷亂"首都圈國電暴動"

遇到地鐵、巴士嚴重脫班，你有幾大忍耐力? 你會選擇上FACEBOOK噴下，永久改坐其他交通工具，定係……

1973年今日，日本嘅國有鐵道同國鐵工會，就因為勞資糾紛所引發嘅按章工作，最終引致民眾憤怒爆標，引來數萬人「勇武介入」，引發日本鐵道史上其中一次最嚴重嘅騒亂事件「首都圈國電暴動」。

話說70年代，國營企業嘅日本國鐵，財政狀況由於二次結束通貨膨脹非常嚴重，同時佢哋多年來都要協助政府吸納戰爭復員同返國人士，種種措施都造成咗沉重嘅負擔，令到財政愈來愈差，而隨。而國鐵亦因此進行大幅度嘅改革。包括加速電氣化路段，甚至以較新嘅柴聯車全面取代蒸汽火車。由於蒸汽火車係要兩人駕駛(1個駕駛＋1個負責加煤嘅助手)，而新車1個就搞掂。因此現代化亦涉及削減人手嘅舉動。員工代遇差劣本來就已經造成勞資雙方關係極差同互不信任，而此舉更更加令以工會為首，各現有員工更加不安同憤怒。

當時剛剛過咗二、三月嘅「春鬥」期，工會同資方嘅角力愈來愈激烈。不過由於國鐵員工係公營企業員工，公營企業等勞資關係法禁止佢哋有任何罷工行動。於是工會經常都會玩「遵法鬥爭」，即係鑽法律漏動，其中一個就係按章工作。

佢哋點按章工作？唔係好似香港巴士司機咁埋站耐啲喎，而係一小時起跳。好似曾經就試過路軌執到件垃圾，由於「有可能引起意外」，所以要確認是否安全才可行駛，結果一等就係一、兩個鐘。

結果民眾不滿嘅情緒最終爆發，1973年今日3月13日終於爆發咗上尾事件，由於高崎線列車延誤引致上尾站有超過1小時冇車埋站，加上及後嘅嚴重超載(因為一有車嚟大家併命爬上火車)，最後國鐵臨時將線路嘅總站上野改為大宮，最終令月台上下逾12000人衝擊列車駕駛室，又擊毀駕駛室車窗玻璃，同追打職員等，並搶去車站儲存嘅20萬日圓現金。騷亂之後蔓延到同線嘅桶川、北本、鴻巢、熊谷等車站，最後警方要加派700名機動部隊到現場，才能逐漸穩住現場局面。

經過今次騷動後，工會雖然立即停止罷工行動，不過談判就仍然冇咩進展。終於，工會於4月再開始按章工作行動終於引發日本鐵道史上極之嚴重嘅騷動。

事件沿於4月24日嘅繁忙時間，由於大宮站嘅東北本線同高崎線列車因按章工作延誤60至90分鐘，令到車站嘅乘客再次佔據站長室，同時延誤亦造成嚴重超載。由上野站開出經停宇都宮往青森嘅「津輕1號」延誤1小時後到達赤羽站，不過由於已經再上唔到客，擠滿月台嘅乘客開始同車站職員衝突，即使鎮暴警察趕到鎮壓，場面仍然迅速失控，京濱東北線列車一駛入月台，就連駕駛室都俾人燒埋，赤羽站基本已經機能停止，由於來往埼玉縣同東京都嘅列車都要通過此處，所以好快就影響到其他車站，甚至連山手線都爆發騷亂。

澀谷、秋葉原、有樂町、新宿、神田、新橋等共38個車站聚集咗32000人騷亂，由放火到破壞設施，到襲擊工作人員都有，亦有人搶劫站內商店同售票處嘅現金同商品，甚至有車站設施被破壞引致煤氣泄漏，整個首都圈直至第二日嘅早上10時前完全停駛，而機動部隊亦總動員驅散群眾，不過事件雖然擴大到整個首都圈嘅騷亂事件，但由於前線警方普遍認為今次問題根本在於勞資抗爭，而市民行為大多只沿於情緒化造成嘅「勇武抗爭」，所以對涉事者都只係採取「驅散」嘅手段，因此最後都只係得一個喺赤羽站放火燒車嘅男人被捕。