[購物日寄]100yen激平防水噴霧 試過先知有冇伏

 

喺日本100yen真係咩嘢都買得到，之但係好唔好用就唔知啦～

今次Mika發現DAISO有隻迷你防水噴霧好似好抵玩咁，

一於就試吓佢好唔好用啦！

噴之前記得戴好口罩，以防吸入過多噴霧；

噴嗰陣唔好向橫或者向下噴，要打直斜斜地噴～

重點係，千祈千祈唔好係噴個陣食煙啊！

唔係後果真係不堪設想／0＼

 

做好準備，大概距離對鞋15cm左右就可以開始噴啦～

一隻鞋大約噴5秒左右，見到鞋面濕濕地就夠！

 

噴完之後風乾15分鐘就OK啦～

即刻試吓佢有幾防水先～

右邊係噴咗防水噴霧，左邊就冇噴，

見唔見到右邊鞋面上面有粒粒水珠，

而左邊鞋面就畀啲污糟水滲晒入去？

啫係話，有～用～嘅！

 

兩隻鞋不停地被我用污糟水攻擊，

再輕輕用水沖一沖之後，

右邊隻鞋明顯白過冇噴噴霧嗰邊好多，抵讚^^

但係就做唔到100%防水咁囉～

 

不過小編真心覺得100yen嘅防水噴霧做到咁已經好抵讚，

正常落雨都唔會搞到連隻襪都濕晒～

如果真係打風咁大雨點算？

着水鞋啦…www