一個人漂洋過海嚟日本留學，邊到帶到咁多嘢過黎喎，緊係喺日本買啦！之但係間屋乜都冇，由零買起，吓吓去franc franc入貨真係多多錢都唔夠洗！好在日本最偉大嘅商店救咗我一命……冇錯，就係100yen店！（只要小小心心唔好中伏就得啦！www）
就由最多人認識嘅DAISO講起啦！DAISO係日本超大型嘅連鎖100yen店，家品、食物、化妝品乜都有咁滯！
廚房用品
[DAISO]我日本屋企（sharehouse）住咗9個日本人，幾乎個個都喺100yen店買碗wwww 我買咗第二行最左邊?個、食飯size啱啱好～仲好卡哇依㖭！
[DAISO]注意！依盒唔係普通嘅錫紙，佢上面係印咗Melody印花㗎～用嚟整便當一流！
[DAISO]隔熱手套除咗黑同紅之外，仲有啡色藍色好多色！隔熱一流就唔洗講啦，依隻手套連防水功能都係一級棒！
話說上次我用個燴蕃薯神器叮蕃薯個陣，隻手套hi到一pat啡色嘅嘔心物體…我緊係即刻用洗潔精捽捽捽再用水沖沖沖啦！神奇嘅事情發生啦：隻手套入面竟然完全冇濕到！GREAT~~~
[DAISO]好多人都覺得平野冇好野，以為平筷子易斷又易甩色。不過DAISO D筷子真係又平又靚又好用！呀媽仲whatsapp我叫我買多幾對㖭www
[コモ．バリエ]依個唔係喺DAISO買，而係係屋企附近一間細細地嘅「コモ．バリエ100YEN SHOP」到入手～本身我其實想買個米缸，但係啲米缸咁大個好阻碇，所以買左個凍水壺載米，意外地好用！直接倒出嚟就得，「米嘜」都唔洗用！
浴室／洗衣用品
[DAISO]洗衣袋絕對係必買item！圓又有方又有扁又有乜都有，梗有一款啱心水！
[DAISO]大伏！毛巾係巨大伏！我買左上面個行藍色個條抹頭巾，結果佢係咁甩毛係咁甩毛……甩到成頭成面都係細細條嘅藍色毛毛……而家我仲未諗好點處置依條毛…巾……
[DAISO]洗頭水、護髮素、沐浴露都係100yen，抵到爛，去邊到搵呀！
[コモ．バリエ]記得大學住宿舍個陣都係IKEA買過一個5蚊定10蚊嘅晾襪架（只係得6個夾），結果用唔夠一個星期就斷咗……依個就好用得多！又大又實淨，就算條晾衫棍幾粗都掛得實～正！
個人護理
[DAISO]癡線㗎！眉鉗＋眉剪＋眉梳都係100yen……仲要鬼咁好用！你叫其他藥妝店點生存呀！
[DAISO]依把較剪係專剪頭髮嘅，我每個星期都用緊佢剪陰～細細把，啱啱好！
[DAISO]依塊鏡有少少犯規，因為要200yen！其實DAISO 100yen嘅鏡都有好多好多選擇，不過如果想要依個花邊就要200yen……我見佢又大塊又可以座枱，OK?100yen豪比你！
[DAISO]依個指甲鉗我覺得麻麻地好用……雖然個鉗可以拉出黎用，但係個套又抆唔到出黎喎，搞到揸起黎好唔方便，同埋D指甲仍然淘氣地飛晒出街（汗）
[コモ．バリエ]查實100yen得3個口罩唔係好抵！但係……有Hello Kitty喎！忍唔住兩款都買咗～
但係點解戴起黎個形狀咁古怪……原來依款口罩係冇上面個條鐵線嘅！唔怪得之啦！
我覺得行出行入戴一陣OK，但戴足一日耳仔會有少少痛……唔知係佢細得滯定係我個頭大得滯啦～,～
足部產品（唔識分類呀/0\）
[DAISO]大間嘅DAISO有好多好多拖鞋，不過唔係對對都咁好著！我唔鐘意一踩落去好似踩住舊木咁硬嘅拖鞋，所以揀左下面數上去第二行左邊數起第三對拖鞋，個底係毛毛質地，意外地滑劣劣同吸汗！好好著！不過如果踩到水嘅話會滲晒上隻腳到（汗）
[Watts]最後想介紹另外一間100yen連鎖店Watts～香港閒閒地都賣五六十蚊嘅啫喱鞋墊（有D仲要貼兩貼就甩！），依到只係需要100yen一對，真係冇得頂呀！我揀左對可以糾正O型腳嘅款，仲有好多唔同款可以揀㗎！極級大推！
商店資料：
DAISO分店多到數唔晒，想查分店地址嘅朋友可以去佢地個官網到睇～
Watts冇DAISO咁出名，但其實都有好多鋪頭㗎！CHECK！
About Post Author
