「隱世酒店」八幡屋究竟如何做「巨人殺手」拉加賀屋落馬？

雖然喺香港，「隱世」就嚟多過OK加7仔(據小編正式統計，小編屋企方圓三公里內係有一個地方係「極邪惡」同三個地方係屬於「隱世」)，係咪用到爛無可爛就見仁見智啦。不過日本就應該未到呢個地步。

 

 

好似於去年年底公佈，日本一個由全國16000間旅行社投選，以專業為賣點嘅嘅「日本酒店‧旅館100選」，連續稱霸36年嘅「加賀屋」終於被拉落馬，而新嘅總冠軍，就係一個名不經傳嘅「隱世酒店」，福島嘅八幡屋。

 

 

雖則「加賀屋」受到上年9月食物中毒事件影響，一早就有風聲今年會讓出總合冠軍，不過萬萬估不到取而代之嘅會係一間「穴場」(罕為人知、少人前往嘅冷僻場所，簡單嚟講即係「隱世」啦…)級嘅旅館。其實唔好話間酒店冇咩人識，就連佢所位於嘅「母畑温泉」，都已經夠晒隱世！

 

究竟「母畑温泉」有過咩歷史紀錄呢？ 據說「八幡太郎(即係源義家)攻打奧州時，喺母畑温泉幫隻馬洗傷口，隻馬突然好返晒，完。」真係好出名囉。所以唔好話日本，就算淨計福島，講出名嘅溫泉，飯坂泉、高湯、土湯、岳、蘆之牧溫泉…真係有排都未到母畑温泉。而事實上，母畑温泉除咗兩、三間蚊型文宿，外，基本上就只有八幡屋一間「有規模」嘅酒店。

 

呢個選舉其實係分咗4個組別嚟評分(待客、料理、設施、企劃)，其實八幡屋一個冠軍都攞唔到，不過由於佢攞咗3個第3、1個第2，所以計總分就贏咗。奇怪嘅係其實「母畑温泉」根本就唔係觀光溫泉，而係湯治場(即係長浸醫病嗰隻…)，所以同觀光溫泉有季節性唔同，佢地係全年忙到飛天。不過亦因為佢哋既客全部係熟客，所以即使佢係有一百幾十間房，可以住800人，有齊各種設施嘅酒店，都冇特別去爭取觀光客。

 

不過311地震後，無論對客同從業員都有好大影響。所以佢哋都不得不同旅行社尋求合作。不過，大型旅行社當然就唔會理佢(係sell都sell出名啦。)，反而係sell著名地點都唔夠大型旅行社鬥嘅小型旅行社反而因為覺得佢哋有水準所以都同八幡屋合作，想不到小型旅行社嘅票數加起嚟，竟然能夠將佢推上第一名，咁就真係始料不及。不過呢個亦都曝露出過份相信大型旅行社同名牌酒店有時真係會走寶。