[那些年，我們一起聽過的日文歌]
今晚，為大家介紹既歌係，宇多田光既<<First Love>>。
喇！巴打絲打們，今晚又一找數！你地點既歌，我係會播架！
最近有人留言俾我，話想我介紹下日劇、電影～
其實，我而家介紹歌之餘，都有搵返劇照俾大家睇，簡介套日劇、電影講咩。
而且，段片都係揀完又揀，較多情節片段架～
希望大家繼續支持呢個環節！繼續支持我！
入返正題，今晚介紹《First Love》，仲記唔記得係邊套日劇既主題曲呢？
係由90年代男神－－瀧澤秀明同女神－－松島菜菜子主演既日劇《魔女的條件》既主題曲黎架！
係1999年播，可能大家都唔太記得套日劇講咩，等我同大家重溫下啦～
係講師生戀，女教師既廣瀨未知搭上男學生既黑澤光。
一講到師生戀，大家會即刻聯想到幾單新聞，男教師搞未成年少女，會覺得好變態，係咪有精神問題？係咪有戀童癖？
而呢套日劇，正正就係講緊呢個極具爭議性既話題。
其實，就咁睇相，覺得無咩問題。
即使女大過男，年齡並唔係一個障礙。
但係身份呢？老師與學生，不被社會接受……
雖然瀧澤秀明個樣無點變過，唔識老咁～
但係係劇入面，帶有少年既青澀味。
黑澤光，佢係一個充滿故事既轉校生。
唔知點解轉校生就一定係特殊背景既家庭長大。
想當年，松島菜菜子真係靚到無得彈！完全唔洗點化妝！！！
有無人草過當年既Yes卡？？？一張有六粒既貼紙架～
（死！我又自爆年齡ww）
佢演既女教師當然就係甚麼美好家庭，由細到大都幫佢安排哂所有野，前途一片光明……
即使不被社會大眾接受認同，但係佢地一次又一次一齊去面對。
證明俾大家睇，佢地係真心相愛。
當年，係日本真係超紅！即使係逢週四夜晚10點先播，但平均收視去到21．5％！！！
好！係時侯送上到肉既歌詞～
明日の今頃には
明天的這個時間
わはきっと泣いてる
我一定會哭著
あなたを想ってるんだろう
想起深愛過的你
今次揀左段較多劇情既片，俾大家一路聽歌，一路睇劇情～
我唔敢講師生戀係岩定錯，我只係知真心愛對方，做得到不離不棄係無錯！
今時今日，有幾多人做得到不離不棄？
唔背住另一半出去偷食已經要殺雞還神！
巴打，當你阿媽話唔中意你女友時，你係咪就聽阿媽話而唔同佢一齊？唔同佢結婚？
絲打，當你屋企反對你同男友一齊時，你又會點做呢？
唔知點做既你，我建議你煲呢套日劇！
因為，瀧澤秀明同松島菜菜子會俾到勇氣你～～～
聽晚同樣時間23點59分有[那些年，我們一起聽過的日文歌] 為你介紹經典歌曲，歡迎留言點唱。
About Post Author
