吉野家為咗慶祝25週年，係西環豐業大廈分店攪咗個120分鐘火鍋放題，店長話俾我知，原來呢到係全世界第一間吉野家攪火鍋放題啊！我居然有機會參與，感到好榮幸啊！（hahaha…超誇張的）
呢個放題只係做一個星期(13-19/1/2016)，想食就要快喇！
平時吉野家個火鍋細細，食完都唔飽，所以有好多人會偷偷地自己買嘢入去加料（唔洗唔認…我知你都有份haha）但今次終於唔洗鬼鬼崇崇喇！就算你想食1000嚿芝士竹輪都唔會有人阻止你！
俾你哋睇下吉野家張宣傳單張了解下~細路仔唔夠140cm收$98~
吉野家放題一共三款湯底同五種火鍋醬料俾大家選擇，湯底有番茄湯、日式雪濃湯和野菜清湯，牛肉、雞腿肉、豚肉無限量供應，仲有我嘅最愛芝士竹輪、黑白墨魚包、響鈴…..多到講唔哂！自己睇喇！仲有仲有….呢度飲野唔洗加$3，汽水、茶、麵豉湯任飲，仲唔收加一。
總共有兩段時段可以揀18:00-20:00、20:15-22:15，不過我建議你早啲去排隊，因為實在太搶手喇！今日我同同事去咗食20:15第二輪嘅放題，由於不容有失，一定要食到然後比包膠你哋，所以我18:00就去咗門口排隊！但我發現其實18:30先去排隊嘅人都有得食。
入到去俾完錢之後，就自己揀醬料，啱哂我呢啲鍾意左溝右溝嘅嘅人。
被安排坐係走廊嘅枱，好孤獨啊…..嗚嗚
但入到去好Warm嘅第一樣野，就係所有食材放好哂係枱面，等緊你喇
可以無限追加配料，芝士竹輪同響鈴都係我鍾意食嘅（hahah….其實吃貨咩都鍾意食）
食食下突然有遊戲玩！鬥快Like同Check in西環新分店，禮物係日本士多啤梨同青口！（士多啤梨得10個名額咋!!!!所以你哋去之前可以預備定
）
我兩樣都贏咗啊!! 叻唔叻啊？士多啤梨好香
結冰青口!!! 笑死我!!
突然大合唱生日歌！原來有人生日啊！場面好溫馨啊！好似開生日Party咁！
今日我真係食得好開心啊！食到大滿足啊！如果想去嘅朋友仔，可以睇睇張地圖。
報告完畢！
About Post Author
