試食名古屋料理：山本屋本店味噌烏冬

一場嚟到名古屋，梗係要試下當地名菜！被譽為名古屋五大名菜嘅包括碁子麵、味噌烏冬、名古屋「手羽先」、味噌豬排同埋鰻魚飯，今日我哋就嚟咗食呢間街知巷聞嘅山本屋本店嘅味噌烏冬。

創業於1907年嘅山本屋本店承傳著當時嘅做法，以傳統手打手法以及獨特嘅風味令味噌烏冬成為今時今日遊人去名古屋都會一試嘅名物。我哋今次就冇去到本店，係名古屋站附近經過見到就入咗去即刻試食啦！

叫期待咗好耐嘅味噌烏冬之前，我哋仲叫咗一碟前菜，就係青唐辛子玉子燒！500Yen有兩舊，食落去蛋汁甜甜地，有甘香。以為唐辛子會好辣，但就完全無辣嘅感覺。

味噌烏冬嘅配料選擇多籮籮，除咗可以畀貴啲選擇一年四季每季不同嘅限定menu之外，一般選擇亦包括普通味噌烏冬、名古屋地雞、豚肉、天婦羅、豬腸等。雖然一般建議食名古屋地雞，因為名古屋地雞有日本三大地雞之一嘅美譽，不過今次我就揀咗天婦羅！

重頭戲上嚟啦！一上台就聞到濃濃藥材味～一掀開個蓋：

嘩！賣相就真係100分啦！！

面上面有生雞蛋，不過其實落單嘅時候店員會問你食唔食得生雞蛋，如果唔食可以換熟嘅雞蛋。

食評：

其實第一次食味噌烏冬，估唔到個味噌味咁勁，濃濃嘅湯底入面仲有少少類似藥材嘅味道。烏冬嘅口感其實超越咗彈牙，而係去到有啲硬身，所以中意食淋啲嘅烏冬嘅朋友可能食得唔係好慣。問下店員先知道，原來名古屋料理的確比較重口味，但個湯底其實係預番俾食客加飯整成「雑炊（湯飯）」咁食，不過作為一個減肥中嘅女仔夜晚食澱粉質真係無得救，所以無咁樣送嚟食嘅我就覺得偏鹹。