喺時候朝聖喇！如果你係鍾意飲咖啡或者有留意利東街最新嘅情報，你可能都會知道來自東京，鼎鼎大名嘅「表參道咖啡」Omotesando Koffee已經登陸香港喇。經過試業期，咖啡店終於正式開張～我阿Anne就事不宜遲去咗嘆返杯，同大家分享番最真實嘅食評啦！
Omotesando Koffee係日本咖啡文青界有著不動嘅地位，但係位於表參道日式小屋嘅店舖已經因樓齡關係無法再經營。當一眾咖啡迷失落之時，邊個又估到佢會開嚟香港？
座落利東街，店面都係走日式簡約利落風。開咗業3日，下晝3點去嘅時候都有人龍！
入門口記得用右邊門，左邊係出口嚟架～
表參道咖啡嘅王牌係Cappuccino (Single Shot $42/Double Shot $50)。不過今日我就試飲Iced Cappuccino (Single Shot $55/Double Shot $63)，因為我聽到有「泡泡」呢兩個字，即刻好好奇Cappuccino點解會有泡泡。
另外我都點咗得香港先有嘅抹茶Latte ($50)，配埋抹茶Brownie ($25)，再試埋自家製嘅Baked Custard — Kashi（燒菓子, $18），perfect池！
表參道咖啡嘅咖啡豆係烘焙自京都老字號「小川咖啡」，而店內亦都用緊日本製嘅濾水器，希望將日本原有嘅咖啡味帶來香港。
利申：我平時有飲開咖啡，但唔係一個咖啡癡，所以以下嘅食評可能未係好專業。一切從口感味道出發～
首先我覺得杯Iced Cappucino ($55) 除咗表面嘅泡泡同爆破嘅一刻係有啲驚喜之外，其實就同其他店嘅Iced Cappucino無異。可能叫double shot 咖啡味會出啲。睇嚟如果真係想品嘗咖啡，都係叫返熱嘅王牌Cappuccino好。因此，我會覺得55蚊杯真係貴左少少…
比起咖啡，抹茶系列我就覺得驚喜大啲。因為見到試業階段好多人話杯Matcha Latte ($50)太甜，我就叫咗少甜。飲落去啱啱好嘅，而且真係唔同出面連鎖嘅綠茶/抹茶飲品嘅味，我真係真係飲到京都個隻抹茶味！雖然都有奶味，但我鍾意飲呢杯多過頭先嘅咖啡呢～
呢粒Kashi ($18)，細細粒幾特別。其實我幾鍾意個口感，入面好鬆化，但味道就真係同想象中有啲出入。唔係話唔好食，但真係唔建議齋食一粒。配返咖啡就幾好嘞。
另外都推薦抹茶brownie ($25)！因為拎係手嘅時候反轉咗，我食嘅時候唔知道原來一面係硬一面係軟嘅，成件事突然驚喜咗。不過稍嫌甜咗少少，令我每一啖都有少少罪惡感呀！出面某大牌子嘅曲奇都可能唔止呢個價，所以我覺得價錢雖然唔平，但接受到。
店內裝潢幾舒服，但我就覺得歇一歇就得，唔坐得耐。
不過利東街出面都好舒服，如果入面無位，不妨拎出去飲，都可以好嘆～
地址：灣仔皇后大道東200號利東街G24-25號舖 （地鐵灣仔站B2出口）
About Post Author
