麵包同咖啡，兩樣都係非常簡單但足夠令人感到幸福嘅食物同飲料。如果你都係一個麵包/咖啡/Cafe迷，今日要介紹嘅呢間新麵包店就非常啱你啦！來自東京表參道嘅超人氣麵包店 パンとエスプレッソと BREAD, ESPRESSO & 除咗有齊日本原裝麵包menu之外，更有香港限定嘅法式麵包同飲品，加上超大落地玻璃可以欣賞街景，相信會係一眾潮文青食客新熱點！
王牌：每日限量30份 招牌法式吐司（單點價 $68、或$98 配手沖咖啡一杯）
真心，一開頭見到$68仲覺得有咩咁巴閉，點知一從廚房端出嚟已經聞到超香嘅味道。加埋蜜糖一切，不得了！超級鬆軟…把刀拮入去直頭好似空心咁！點解每日只賣30舊？其實每一份都得來不易，做法同日本本店一樣，去邊之後將法式方包浸喺日本雞蛋、鮮奶、糖及法國忌廉混合而成嘅蛋漿之中，等佢充分浸透和吸收蛋漿後再冷藏 24 小時…而每份吐司都係喺每份order落咗之後用鐵板以明火煎香再烘焗而成，而且會原份連鐵板奉上。
而蜜糖更加係畫龍點睛，來自意大利嘅洋槐花蜂蜜，清新到一個點，喺我食過咁多蜜糖入面最好食之一！（真係好有沖擊呀！）不過唔中意食太甜或者怕好漏嘅就落少啲喇～
香港限定MENU（全部都係坐鎮香港店嘅麵包師Patrick Yim設計㗎）：
櫻花鹽迷你法式方包 $15
煙三文魚刁草法式鹹撻 $26
香腸洋葱法式鹹撻 $26
香港限定飲品MENU：
（最前）蝶豆花玫瑰冰茶 $58 (超迷幻，想影相呃like嘅話絕對一流～）
（圖中）蜂蜜脆脆沙冰 $58
（圖後方）紫薯沙冰 $58
BREAD, ESPRESSO & 喺日本東京同大阪共有八家分店，也台灣、韓國亦有開設分店。
座落於尖東漆咸道嘅BREAD, ESPRESSO & 店內裝潢採用簡約木質設計，配上大型落地玻璃令店內光線充足。坐喺原木餐檯上品嚐優質法式手工麵包、招牌法式吐司、專業咖啡師從世界各地選購返黎嘅稀有咖啡，繁忙都市人都可以享受難得嘅悠閒時光～
3月13日正式開幕大家記得去試喇！
朝聖之前欣賞下日本食家們嘅相作：
BREAD, ESPRESSO &
地址：尖沙咀漆咸道南115號地下
電話：2320 1228
營業時間：星期一至日 8am-8pm
About Post Author
