又到聖誕～又到聖誕。相信唔少人都會同朋友一齊開返3, 5, 7個Party慶祝一下。飲酒就當然唔少得啦！唔想黎黎去去都係飲啤酒，紅白酒等等凍冰冰嘅話，今年聖誕大家可以試下自己係屋企玩「熱燗」清酒，齊齊暖笠笠！
可能大家接觸清酒比較多都係「冷酒」，「熱燗」可能有啲朋友仲未試過添。其實日本清酒嘅品嚐溫度個Range比較闊，以前無雪櫃嘅年代，除左「燗酒」以外其他溫度都叫做「冷酒」，姐係室溫咁，冬天大概5℃，而夏天就大概20℃左右。宜家有左雪櫃之後，係10℃左右先叫做冷酒。室溫以外，將清酒加熱到30度以上就開始叫做「燗」。
「燗酒」嘅好處係，可以將平時冷酒好難感受到嘅複雜味道同米香引發出黎，由入口至到吞落肚個一刻都會可以感覺到溫和飽滿，而且飲落肚仲好暖胃添！
熱燗「純米酒」同「生酛系」最岩
一般黎講最適合「燗」飲嘅清酒會係「純米酒」同埋「生酛系」嘅清酒，「燗」嘅溫度會提昇佢地複雜嘅味道。而「吟釀酒」通常就唔太適合「熱燗」喇，因為高溫度會將佢地嘅最注重嘅香氣揮發消散，清爽感都會消失。
簡易Homemade熱燗教學
1. 將酒加至酒瓶嘅8-9分滿，再用保鮮膜將瓶口封住以免香氣走失。
2. 將水放入鍋入面，放入已注滿酒嘅酒瓶，度下水位，將水位調整到沉到瓶身嘅一半。
3. 拎返酒瓶出黎，將水煲滾之後熄火。
4. 熄火後將酒瓶沉入鍋入面，等大概３分鐘左右。如果要去到40℃的話可能要10分鐘時間，長時間的話會令酒精揮發，所以盡量係３—４分鐘內完成！
5. 當酒瓶中水位接近酒瓶口的話就代表OK喇!
6. 呢個時候最好有支溫度計啦，如果無嘅話用手摸下個底，感到少少熱手的話就代表溫度岩岩好喇！（大概35~40℃）
上個月酒友酒魅嘅活動我地就用左打邊爐嘅電磁爐黎整！大家可以參考下！
今個聖誕大家可以買支清酒，一路同朋友傾住傾，一路慢慢跟住試下喇！
不過提提大家，「燗酒」唔可以飲咁快，因為會比冷酒更快吸收精酒，唔想咁快醉就慢慢飲喇！
Source: 日本酒の教科書、FBO情報基地のブログ、菊水酒造ホームページ
About Post Author
