去福岡旅行，好多時都會去埋附近城市，好似北面嘅北九州市或者西面嘅佐賀市等等。今次筆者就去咗人氣同樣高，位於福岡縣南部嘅柳川。
由福岡市去柳川非常方便，只要喺西鐵天神車站就可以買到車飛。今次筆者於出發當日朝早8點喺車站買咗依張「太宰府柳川觀光車票」，入面包括天神到柳川、柳川到太宰府、太宰府返回天神嘅車票，同埋喺柳川坐觀光船嘅換票證等，大人承惠2,930円。建議揀翻坐特急，咁就唔洗站站停，慳番啲時間玩啦！
大概坐咗一個鐘西鐵就到柳川啦。離開車站閘口會見到有個伯伯，佢會問你係咪買咗觀光車票，只要畀張換票證佢就會安排你坐接駁巴士，去坐觀光船嘅位置啦！
終於到啦，雖然當日朝早天色有點陰沉，不過景色都非常之唔錯。船夫沿途會介紹風景同埋歷史，而因為船上有韓國同台灣嘅遊客，船夫仲分別唱咗經典嘅韓文同國語歌添！
遊船河到中段，就會有個「補給站」，大家可以買啲小食同飲品，邊睇景邊食野飲野～
坐左大概45分鐘就完啦，時間大概係上午11點，筆者已經有少少餓。嚟到柳川，當然唔可以唔試依度最出名嘅鰻魚飯啦！因為太多店舖有得食，所以就點指兵兵咁揀咗依一間「民藝茶屋 六騎」喇！可能因為未到午市，所以入面得一枱客，但一於唔理咁多，一坐低就叫左一份大鰻魚飯。
一打開個盒，蒸氣同香氣飄晒出嚟！鰻魚非常肥美，醬汁唔會太濃，仲可以食到鰻魚本身嘅魚味。再加上飯係用咗鰻魚汁煮成，所以每一啖都係「鰻魚」呀！
民芸茶屋六騎 （ろっきゅ）
地址：福岡県柳川市沖端町28
營業時間：10:30〜17:00
定休日：逢星期二休息
食飽飽就再周圍行，但因為之後會再去太宰府，所以就去坐巴士翻西鐵站啦～等車之際，見到係巴士站對面有個牌寫住「古著屋西海岸」，超鍾意睇古著嘅筆者就二話不說衝左入去。
一打開大門，一望入去！「嘩！係古著嘅天堂呀！」唔講咁多，睇圖最實際！
唔係講笑，依度真係咩都有得賣，好似T-shirt、牛仔褲、恤衫、長裙短裙、工作服、飾物、鞋類、傳統日本服飾⋯⋯真係數之不盡，估唔到去鄉郊地區都有得出血。筆者買左三條西褲，都係580円一條！！！真係學達哥話齋，「轟呀！喊出嚟呀！！！」
筆者強烈呼籲，如果你你係古著迷，又或者唔介意二手衫同埋想瘋狂血拼？係依度啦！Bookmark 佢啦！
西海岸（柳川店）
地址：福岡県柳川市城隅町11-2
營業時間：10:00~19:00
網址：http://nisikaigan.com/
About Post Author
