同大家介紹過好幾個石垣島嘅景點，由緊張刺激嘅紅樹林加獨木舟到親親大自然嘅私煮農家菜，全部都令我印象深刻。而今次想同大家介紹嘅最後一個景點，就係可以瘋狂呃Like嘅「米子燒工房」喇。
▼從機場開車過嚟大約20分鐘，一落車你就可以見到呢個咁鮮艷嘅門面，唔駛驚搵錯。
▼店面周圍放滿各式各樣嘅「風獅爺」，相傳只要喺屋頂放上風獅爺就可以去除惡靈帶嚟嘅災難，避邪保平安。隨著時代演變，風獅爺亦都多咗好多唔同嘅風格，鮮艷嘅色彩亦都俾人一種活潑同幸福嘅感覺。
▼如果你以為淨係得門口個幾隻咁就太天真，因為店旁邊仲有一大片空地擺放住形形式式嘅風獅爺，場面非常壯觀。
▼好好彩我地去嘅時候係大晴天，加埋咁色彩繽紛嘅背景真係點影都咁靚。
▼入面每一隻風獅爺都有唔同嘅造型，玩味十足。
▼好似好威武嘅守護神。
▼日本鳥居。
▼香港人常用Emoji「喊住笑」。
▼仲有疑似Line Friends嘅James！？
▼入番工場可以到見到師傅好專注咁整緊風獅爺。原來呢間「米子燒工房」嘅主人連勝久誌一開始成立只係為咗好玩，想幫風獅爺加多啲活力，點知越來越多人因為好奇而嚟，結果而家就發展成一個知名嘅旅遊熱點。
▼一場嚟到無理由唔買番啲手信嘅，店內除咗造型擺設之外，仲有電話吊飾同門牌等販賣。
▼不過除咗風獅爺，其實店內仲有另外一款非常熱賣嘅商品，就係呢個「教訓茶碗」喇。
▼「教訓茶碗」睇落同普通碗好似無咩分別，但其實只要將水倒超過八分滿，所有水都會流走。提醒大家做任何事都要恰如其份，適可而止，如果太貪心最後就只會一場空。
▼現場都有一隻任你地試玩㗎。
後記：呢個景點令人充滿驚喜，特別係一片充滿風獅爺嘅空地，你永遠唔知道下一個出現嘅會係咩。而且每隻造型都相當特別，要影晒嘅話都真係要花一定時間，喜歡攝影嘅朋友建議可以預留約一至兩個小時。另外同行嘅團友研究咗一陣都唔明白「教訓茶碗」當中嘅原理，如果你地知道答案嘅話，不妨留言話我知啦。XD
【米子焼工房】
地址：沖縄県石垣市桴海（米原）４４７
電話：0980-88-2559
時間：9:00～17:45
官網：http://yonekoyaki.web.fc2.com/home.html
其他石垣島文章回顧：
特別嗚謝：HK Express 和 Visit Okinawa hk 沖繩觀光會議局
About Post Author
