之前同大家報導過Skytree將會有PPAP Cafe，我地都知道好多香港朋友都想知咩事但又未必黎到東京，所以今日就同大家直擊，順便帶大家一齊玩Skytree一日遊喇！
其實Skytree真係好大（高就唔駛講XD），但其實同樓下嘅Solamachi商場係分開嘅。不過當然難得嚟到就一齊玩埋啦！我哋仲搵咗啲推薦店舖俾大家，記得睇到最後！
PPAP Cafe位置其實就係Skytree入口個層嘅TV Shop隔離。呢個位其實就開放做唔同主題嘅期間限定Cafe，所以下次你哋嚟嘅時候可能都變咗做其他主題～Menu上嘅嘢食都係同PPAP有關，我哋就揀咗招牌嘅PPAPancake同埋原隻菠蘿沙冰PPAP Juice。真係好香菠蘿味囉！
班戟其實就係一般普通熱香餅，不過夾埋雲尼拿同菠蘿塊一齊食又幾爽口，只不過係一般屋企都整到嘅嘢食（笑）。Vivi就試咗Juice，大大啖飲完先發現完來係沙冰！不過口感又幾好，同埋真係好香菠蘿味！（但冬天飲都幾係嘢）
食完嘢入去行TV Shop都會見到好多電視節目、動畫精品，當然唔少得PPAP Corner啦！聽講會擺到年尾，如果想買啲搞笑手信俾朋友都可以揀下呢度！
食完嘢就準備上去睇Skytree喇！呢度其實日本遊客多過外國遊客，所以如果大家想快啲買到飛，可以去呢個外國人專用counter。其實上到去都仲分兩層，所以會有3000Yen同4000Yen嘅選擇。至於上多幾層到底有咩分別，繼續睇啦！
連架?都係亮點：4架?分開春夏秋冬四季主題，我哋搭嘅係夏天，有象徵住隅田川煙花嘅圖案，而且係用玻璃造嘅，超靚！眨下眼就到咗最頂㗎啦～
上到嚟之後出嚟向右行少少已經係對正富士山，如果好彩嘅話就會見到富士山山頂，今次居然比我撞正！勁開心呀！
除咗呢層之外，畀多1300yen就可以再上455m高嘅天望迴廊。一開始我仲懷疑，而家已經咁高，其實再高啲真係差咁遠咩？但搭埋上去個程?，我就發現，原來真係感受到個分別…
上面個層少人啲，可以慢慢行同影相，去到最高點仲有特大玻璃可以瘋狂影風景相，正！
回程嘅路途會見到呢個透明玻璃可以感受下直望地下，仲可以影相留念！好正架！
今次我哋介紹住咁多先～
其實我嚟過Skytree都幾次，但都真係第一次上嚟，唔上都唔知原來個景色真係咁靚，而且係日頭睇日景都覺得心曠神怡！極度推薦大家有機會撞正好天氣一定要上嚟望下！另外下面嘅Solamachi商場都好好行，各種商店都有。我同Vivi就搵咗啲特色舖頭推介俾大家，下集會講，大家記得留意呀～
About Post Author
