我諗大家都對「熊本熊」呢個吉祥物並唔陌生，但你哋又對「熊本縣」有幾多了解呢？你哋又知唔知熊本縣座落於日本邊一個地方？……冇錯喇！就係「九州」！
我自己都未去過九州，但喺9月22日至10月2日，荃灣廣場會舉行由「日本經濟產業省」主辦嘅「TOUCH THE KYUSHU九州物產祭」，就有一個機會畀大家「睇」驗晒九州秋季魅力！當中分別介紹九州七個縣（熊本、宮崎 、福岡、大分、佐賀、長崎、鹿兒島）嘅文化同產品，好值得大家深入了解㗎！
Oh～Oh Oh Oh～Oh Oh Oh～～～我眼睛想旅行！等我率先同大家報告一下現場有咩玩啦！
「九州物產祭」開幕當日，大會專程邀請咗松田邦紀先生（日本駐香港總領事暨大使）同埋川原昌喜先生（九州經濟産業局國際部投資交流促進課課長）為大家致辭同主持開幕禮。最意外係，連比卡超都嚟咗啊
！
！
開幕禮結束之後，仲有熊本縣山鹿市傳統嘅「山鹿燈籠舞」表演！
（兩位身穿浴衣嘅女舞蹈員，戴住「金燈籠」翩翩起舞，相當有韻味！）
趁空檔同兩位舞蹈員影下相先！(我仲趁機叫佢教我跳添！）
現場有個九州旅遊「睇」驗區，配備咗「VR裝置」比你試下感受九州唔同縣嘅景色，我就分別「睇」驗咗「大分縣」同「宮崎縣」，宮崎縣比較多自然嘅景色，有天安河原，仲有好多植物睇；大分縣原來有勁多溫泉，有個血之池地獄溫泉成個溫泉都係紅色，哈，睇完好想知現實究竟會係點。
第一次玩VR，感覺真係好新奇，大家睇下片入面我嘅表情就知啦哈哈！
有得玩之餘，就梗係有得食啦，我分別遊走咗唔同縣嘅攤位「搵食」哈哈！
呢隻鹿兒島縣出品嘅「黑伊佐錦」燒酎 ，飲落有陣蕃薯味幾特別，酒精濃度仲高達25％！小妹喺現場飲咗一小杯，已經面都紅晒！
宮崎縣就有Momiki黑蒜，另外有款醃蘿蔔，味道分梅味、昆布味同辣味，聽店員講仲係第一次帶嚟香港介紹俾大家！
於大分縣創業達100年嘅「近藤養蜂場」出產嘅生姜蜂蜜漬！哈哈，我仲貪得意加咗落啲酒度飲，覺得好飲咗添！
（P.S. 攤位有個男店員表情多多好搞笑，大家睇下我條片就知～～～）
除咗試咗鹿兒島縣嘅燒酎 ，去到福岡縣仲試咗「直会」燒酎，飲落去有陣陣嘅芋頭嘅香味幾易入口，不過酒精濃度一樣係25％！
現場仲有「一田百貨」設置嘅美食攤位，開賣地道九州物產同美食，店員超級Nice，同我介紹咗好多嘢食，好似佐賀嘅波子汽水、熊本嘅杯麵、長崎嘅酒等等，最尾我都買咗幾樣返去試試。
「TOUCH THE KYUSHU九州物產祭」舉辦到10月2日咋，如果想對九州有更多認識（又或者想去試下九州縣嘅美食），記得約埋朋友去睇下！
（要讚讚現場Helper姐姐好Nice啊！）
（我最愛嘅比卡超！！！）
Oh～Oh Oh Oh～Oh Oh Oh～～～我眼睛想旅行！
Oh～Oh Oh Oh～Oh Oh Oh～～～到九州的旅行！
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
P.S. 我好好人，幫大家整咗個特別活動時間表，咁你哋自己識去玩啦！
【山鹿燈籠舞】：「TOUCH THE KYUSHU九州物產祭」首次將傳統「山鹿燈籠舞」帶到香港！每年8月熊本縣山鹿市大宮神社都會舉辦「山鹿燈籠祭」，舞蹈員會頭頂金燈籠翩翩起舞，形成一層又一層的燈輪光環。
【京築神樂】：在冬至時分，日本全國各地都會舉辦邀請神明，獻上舞蹈的「神樂」祭典。舞者會成為神明，和村民一起玩通宵。是次九州舞台為大家帶來的是京築神樂，是京築地區的文化財產，在全國各地均有公演，讓大家感受到京築魅力的活動。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
「TOUCH THE KYUSHU九州物產祭」活動詳情
日期及時間：由即日起至10月2日
地點：荃灣廣場L1中庭 (香港新界荃灣大壩街4-30號)
*喺荃灣西鐵站出面行天橋10分鐘就去到㗎啦，好方便！*
About Post Author
